قىرعىزستان رەفەرەندۋمعا بايلانىستى جاڭا ساياسي جانجالعا تاپ بولدى

قىرعىزستانداعى كونستيتۋتسيالىق رەفەرەندۋم ونسىزدا اۋىر ساياسي داعدارىستى ءتىپتى دە اۋىرلاتا تۇسەتىندەي. قىرعىز قوعامىنداعى كوپتەگەن ساياسي توپتار مەن پارتيالار، ازاماتتىق قوعام وكىلدەرى سادىر جاپاروۆ باستاعان اتا زاڭدى وزگەرتۋگە دەگەن ۇسىنىستارى ەلدى رەگرەسكە ۇشىراتادى دەپ قاۋىپتەنۋدە. ازاماتتىق بەلسەندىلەر مەن زيالى قاۋىم وكىلدەرى بيلىكتەن رەفەرەندۋمدى توقتاتۋدى تالاپ ەتۋدە.

باس ميزامنىڭ جاڭا نۇسقاسىن تالقىعا سالعان جيىنعى ەكس-پرەزيدەنت روزا وتىنباەۆادان تارتىپ، ەكس-پرەمەر-مينيستر فەليكس كۋلوۆ، جوعارعى كەڭەستىڭ بۇرىنعى توراعاسى ابدىعانى ەركەباەۆ جانە بۇرىنعى ۆيتسە-سپيكەر قۋانىشبەك يسابەكوۆ تە بار. قىرعىز قوعامىنىڭ بەلسەندىلەرى ءبىر اۋىزدان جاڭا نۇسقانى جارامسىز دەپ سىنعا الدى جانە سادىر جاپاروۆتى بيلىكتى ۋزۋرپاتسيالادى دەپ ايىپتادى.  

بىشكەكتەگى وتىرىستا «اتا-مەكەن» فراكتسياسىنىڭ جەتەكشىسى تەكەباەۆ تا جاڭا كونستيتۋتسيالىق جوبانىڭ بيلىكتى ءبىر قولعا توپتاستىرىپ، ناتيجەسىندە اۆتوريتاريزمعا الىپ كەلەتىنىن العا تارتتى.

ەل وسى جاڭا نۇسقانى ۇسىنعانداردىڭ ءبىرى جانە جاقىندا عانا پرەزيدەنتتىڭ قىزمەتىن ۋاقىتشا اتقارۋىن توقتاتىپ، پرەزيدەنتتىك سايلاۋعا ءوز كانديداتۋراسىن ۇسىنعان سادىر جاپاروۆ جاڭا جوبانى سىناعانداردى ايىپتادى. ول الەۋمەتتىك جەلىدەگى سوزىندە: «بۇل ءبىر ادامنىڭ نەمەسە ءبىر عانا توپتىڭ مۇددەسىن قورعايتىن زاڭ ەمەس. جالپى ەلدىڭ، مەملەكەتتىك مۇددەسىن كوزدەگەن اتا زاڭ. بۇل جوباعا قارسى شىعىپ جاتقان انا باسشىنىڭ شىنايى بەت بەينەسىن ءبىر-اق كۇندە جايىپ سالام»، – دەپ جازعان.

وسىلايشا قىرعىزستاندا بۇعان دەيىنگى ساياسي داۋ-دامايدان تىسقارى جاڭا كونستيتۋتسيا توڭىرەگىندە ءوز الدىنا ءبىر ساياسي داۋ-شار باستالىپ كەتتى. جاڭا كونستيتۋتسيا جوباسىن قولداپ، سول بويىنشا رەفەرەندۋم وتكىزۋدى جاقتاعاندار پارلامەنتتىك جۇيەدەن باس تارتىپ، پرەزيدەنتتىك جۇيەگە كوشۋدى قولداپ وتىر. ال، روزا وتىنباەۆا باستاعان بىرقاتار ساياسي پارتيالار بۇل ەلدى 20-30 جىلعا كەرى شەگىندىرەدى دەپ سانايدى.

“The Qazaq Times”