الماتىدا ءوتىپ جاتقان بەيبىت شەرۋ كەزىندە «قازاقستاننىڭ دەموكراتيالىق پارتياسىن» قۇرعىسى كەلەتىن باستاماشىل توپتىڭ جەتەكشىسى جانبولات ماماي باستاعان توپتى ارنايى جاساق وكىلدەرى قورشاۋعا الدى.

شەرۋگە كەلگەن قالا اكىمىنىڭ ورىنباسارى «جانبولات ماماي قايتادان ءوتىنىم بەرسە، بەس كۇن ىشىندە قاراپ، رۇقسات بەرەمىز» – دەيدى. ماماي جاقتاستارىمەن الماتى قالاسىنىڭ اكىمى ساعىنتاەۆتىڭ كەلۋىن تالاپ ەتىپ وتىر.

كەيىننەن قالا اكىمىنىڭ كەلمەيتىنى ءمالىم بولعان سوڭ، جانبولات ماماي ەشقايدا كەتپەيتىنىن ايتتى. ول بيلىككە ءۇش تالاپ قويىپ وتىر: حالىققا نەسيەلىك امنيستيا جاريالاۋ، جەر ماسەلەسى جانە ساياسي تۇتقىندار بوستاندىعى.

6 ماۋسىم تاڭەرتەڭنەن بەرى دوستىق داڭعىلى مەن قۇرمانعازى كوشەسىنەن جوعارى قاراي جاياۋ جۇرگىنشىلەر قوزعالىسى شەكتەلدى. سونىمەن قاتار اباي مەن نازارباەۆ، قۇرمانعازى مەن قوناەۆ قيىلىسىنا بەكەتتەر قويىلعان. وپپوزيتسيا ميتينگىلەرىنىڭ ءداستۇرلى ورنىنا اينالعان «استانا» جابىلدى. اتالعان جەردە دە پوليتسەيلەر مەن اۆتوزاكتار تۇر.

شەرۋگە شامامەن 150-گە جۋىق ادام جينالعان. نارازى توپ «نازارباەۆ قۇرعان جۇيە قۇرىسىن!»، «نۇر وتان تاراتىلسىن!»، «جەر شەتەلدىكتەرگە ساتىلماسىن، بەرىلمەسىن» دەپ ۇرانداتتى. تاڭەرتەڭنەن بەرى 15 شاقتى بەلسەندىنى پوليتسيا كۇشپەن الىپ كەتتى. ۇستالعاندار قاتارىندا ازاماتتىق بەلسەندى اسيا تولەسوۆا دا بار.

ايتا كەتەرلىگى، شەرۋگە «نۇر وتان» مۇشەلەرى دە كەلگەن. ولار نارازى جۇرت پىكىرىنە قارسى كونترارگۋمەنتتەر كەلتىرگەن.

وسىعان دەيىن تىركەلمەگەن «دەموكراتيالىق پارتيا» جانە شەتەلدە تۇرىپ جاتقان ەكس-بانكير، وپپوزيتسيالىق ساياساتكەر مۇحتار ءابليازوۆ جاقتاستارىن 6 ماۋسىمدا ميتينگىگە شىعۋعا شاقىرعان بولاتىن. ميتينگىلەر قارساڭىندا ءار ايماقتا بەلسەندىلەرگە قىسىم كۇشەيىپ، ۇستالا باستاعان. باس پروكۋراتۋرا ميتينگىلەردىڭ زاڭسىز ەكەنىن ايتىپ، جۇرتتى نارازىلىققا شىقپاۋعا شاقىرعان.

"The Qazaq Times"