وڭتۇستىك كورەيا، قىتاي، سينگاپۋر جانە وزگە دە بىرقاتار ەلدەر Covid-19 ىندەتىن تىزگىندەۋگە قاۋقارلى ەكەنىن كورسەتكەندەي بولدى. جاپونيادا دا ۆيرۋسقا شالدىققاندار سانى ازايىپ، حوكككايدو سىندى ىندەت جاعدايى اۋىر بولعان قالادان توتەنشە جاعداي الىنىپ تاستالدى. جالپى ازيا ەلدەرىندە جاعداي وڭالىپ كەلەدى، بىراق بۇنىمەن قاۋىپ سەيىلىپ كەتكەن جوق. ازيا ەلدەرىنە ەندى ەۋروپا مەن اقش-تان باراتىن كوروناۆيرۋستىڭ ەكىنشى تولقىنى جاڭا قاۋىپ ءتوندىرۋى مۇمكىن. بۇل تۋرالى الەمدەگى ءىرى اقپارات قۇرالدارى جارىسا جازىپ جاتىر.

سوڭعى ءبىر تاۋلىكتە پاندەميا وشاعى بولعان ۋحان قالاسىندا ۆيرۋسقا شالدىققان ادام تىركەلمەدى. كوپ ۋاقىت ءۇي كارانتيندە وتىرعان تۇرعىندار سىرتقا شىعۋىنا مۇمكىندىك الدى. ساراپشىلاردىڭ پىكىرىنە سەنسەك، ازيا ەلدەرى ءۇشىن قورقىنىش ارتتا قالدى. الايدا، ۆيرۋستىڭ تارالۋ ديناميكاسى وزگەرگەنىنە نازار اۋدارۋ كەرەك. قازىر ۆيرۋس ەۋروپا مەن امەريكانى ۇرەيدە ۇستاپ تۇر. قازاقستانعا جانە كوروناۆيرۋستىڭ العاشقى داۋىلى سوعىپ وتكەن شىعىس ازيا ەلدەرى ەندى ەۋروپا مەن امەريكاعا شەكاراسىن جابا تۇرۋى مۇمكىن.

«ازياعا قايتىپ كەلگەن ۆيرۋس»

سوڭعى كۇندەرى قىتايدا تىركەلگەن ۆيرۋس جۇقتىرعان 34 ادام تۇگەلدەي شەت مەملەكەتتەردەن كىرگەنى انىقتالدى. سينگاپۋردا سوڭعى تاۋلىكتە تىركەلگەن 47 ادامنىڭ 33-ءى ۆيرۋستى شەتەلدەن جۇقتىرىپ كەلگەن. ونىڭ وتىزى ۇيىنە قايتىپ كەلگەن سينگاپۋر ازاماتتارى.

ۆيرۋستىڭ تارالۋىنا قاتىستى ستاتيستيكا كورسەتكەندەي ازيا ەلدەرى ءۇشىن قاۋىپتى كەزەڭ ءوتىپ كەتكەنىمەن، ونىڭ اياقتالۋىنا ءالى دە كوپ ۋاقىت بار. بۇعان وڭتۇستىك كورەيانى مىسال ەتسە بولادى. وڭتۇستىك كورەيا ىندەتكە قارسى دەربەس شارالارىمەن جاقسى ناتيجە كورسەتتى، بىراق، ىندەتتىڭ تارالۋى قايتا كۇش الىپ، ەل بيلىگىن ءالى دە ابىگەرگە سالىپ جاتىر.

“The Qazaq Times”