فوتو: DW

اقش پرەزيدەنتى دونالد ترامپ كوروناۆيرۋسقا بايلانىستى ۇلتتىق دەڭگەيدە توتەنشە جاعداي جاريالادى.

ۆloomberg حالىقارالىق اقپارات اگەنتتىگىنىڭ دەرەگىنشە، اقش-تا بۇگىنگى جاعداي بويىنشا اتالعان دەرتكە 2117 ادام شالدىقسا، 49 ناۋقاس كوز جۇمعان. ال الەم كولەمىندە 5131 ادام كوروناۆيرۋستان قايتىس بولىپ، 140 مىڭداي ادامعا جۇعىپ ۇلگەرگەن. ەڭ كوپ قازا بولعاندار سانى ۋاشيعتون شتاتىندا 37 ءولىم تىركەلگەن.

ونىڭ ايتۋىنشا، ۆيرۋستى انىقتايتىن سىناق ءوندىرىسىن جىلدامداتۋ ءۇشىن فەدەرالدى ۇكىمەت جەكە بيزنەسپەن ارىپتەستىك ورناتىپ، بىرگە جۇمىس ىستەيدى. ترامپ كوروناۆيرۋستى انىقتايتىن شامامەن 5 ملن تەست شىعارۋدى جوسپارلاپ وتىرعانىن ايتتى. توتەنشە جاعداي اياسىندا شارالاردى جۇزەگە اسىرۋعا 50 ملرد دوللار بولىنەدى.

"ەڭ باستىسى - ۆيرۋستىڭ زاردابىن شەكتەۋ" دەدى ترامپ. ول مۇنداي كۇردەلى كەزەڭنىڭ سوزىلمالى اۋرۋعا شالدىققان ەگدە جاستاعى ادامدارعا اۋىر تيەتىنىن ايتتى.

13 ناۋرىز كۇنگى ءباسپاسوز جيىنىندا باعدارلامانى جۇزەگە اسىرۋ مەرزىمى ايتىلعان جوق، بىراق ونى تەزىرەك ورىنداۋ قاجەتتىلىگى ايتىلدى.

جيىندا پاندەميانىڭ ۇزاقتىعى تۋرالى سۇراققا جاۋاپ بەرگەن دارىگەرلەردىڭ ءبىرى "قانداي دا ءبىر بولجام جاساۋ قيىن، بىراق ەگەر ۆيرۋستىڭ قالاي ارەكەت ەتەتىنىن بايقاساڭىزدار، شامامەن جەتى اپتا بويى كۇشەيەدى دە، سوسىن ونىڭ كۇشى ازايادى. ۆيرۋستى شارىقتاۋ شەگىنە جەتكىزبەس ءۇشىن ارەكەت قىلامىز" دەدى.

ازاتتىقتىڭ ايتۋىنشا، توتەنشە جاعداي 1988 جىلى قابىلدانعان ستاففورد زاڭىنا سايكەس ەنگىزىلەدى. بۇل زاڭ پرەزيدەنتكە جالپىۇلتتىق توتەنشە جاعداي ەنگىزىپ، ونىڭ سالدارىن جويۋعا توتەنشە جاعداي جونىندەگى فەدەرالدىق اگەنتتىك قورىنان بيۋدجەت بولگىزۋگە مۇمكىندىك بەرەدى. زاڭ سيرەك قولدانىلادى. 2000 جىلى پرەزيدەنت بيلل كلينتون ەلدە بەزگەك اۋرۋىنىڭ تارالۋىنا بايلانىستى توتەنشە جاعداي جاريالاعان.

;feature=emb_title

ساقبەك مايا

"The Qazaq Times"