فوتو: ازاتتىق راديوسى

بۇگىن ءبىر توپ بەلسەندى كوروناۆيرۋس ىندەتىنىڭ ورشۋىنە بايلانىستى الماتى قالاسى اكىمدىگىنە جينالدى. ولار پرەزيدەنت قاسىم-جومارت توقاەۆقا بىرنەشە تالاپتى قامتيتىن حات جولدادى. بەلسەندىلەردى قالا اكىمىنىڭ ورىنباسارى ەرجان باباقۇمار قابىلدادى. الايدا جيىنعا اقپارات قۇرالدارى قاتىستىرىلعان جوق.

قوعام بەلسەندىسى بالتاش تۇرسىمبايدىڭ سوزىنشە، باق وكىلدەرىن جيىنعا كىرگىزبەۋ دۇرىس ەمەس. سەبەبى كوروناۆيرۋسكە قارسى شارالاردان زالىق قۇلاعدار بولۋى ءتيىس.

پرەزيدەنتكە ۇسىنىلعان حاتتا:
- قازاقستان-قىتاي شەكاراسىن جابۋ، قىتايدان تاۋار تاسىمالداماۋ;
- كوروناۆيرۋس دەرەكتەرى انىقتالعان مەملەكەتتەرمەن اۋە قاتىناسىن توقتاتۋ;
- الماتىدا كارانتيندە جاتقان 111 قىتاي ازاماتىن ءوز ەلدەرىنە قايتارىپ، ولاردىڭ ورنىنا قازاقستان ازاماتتارىن ورنالاستىرۋ;
- دارىحانالارداعى ماسكا تاپشىلىعىن جويۋ;
- باق ارقىلى حالىقتى اقپاراتتاندىرۋ جانە مەملەكەتتەن بولىنگەن قارجىنىڭ جۇمسالۋىن قاتاڭ قاداعالاۋدى تالاپ ەتكەن.

الماتى اكىمى باقىتجان ساعىنتاەۆتان جاۋاپ كۇتەمىز دەگەن باستاماشىل توپ وكىلى رىسبەك سارسەنباي بەلسەندىلەر وسى تالاپ-ارىزدىڭ ورىندالۋىن قاداعالاۋ ماقساتىندا 13 ناۋرىزدا اكىمدىك الدىنا قايتا جينالاتىنىن ايتتى.

بۇگىن دەنساۋلىق ساقتاۋ مينيسترلىگى قازاقستاندا شامامەن مىڭعا جۋىق ادامنىڭ كارانتيندە جاتقانىن حابارلادى. كوروناۆيرۋس تابىلعان ەلدەردەن كەلگەن 8 مىڭنان استام ادام دارىگەرلەر باقىلاۋىندا. بۇعان دەيىن «قازاقستان تەمىر جول» ۇلتتىق كومپانياسىنىڭ باسقارما توراعاسى ساۋات مىڭباەۆ كوروناۆيرۋسقا قاراماستان قازاقستان قىتايمەن جۇك تاسىمالىن توقتاتپايتىنىن حابارلادى.

ايتا كەتەيىك، وشاعى قىتايدىڭ حۋبەي پروۆينتسياسىنان باستالعان COVID-19 ۆيرۋسى 81 مەملەكەتكە تاراپ ۇلگەرگەن. سوڭعى دەرەكتەر بويىنشا، الەمدە 98512 ادام ۆيرۋس جۇقتىرسا، 3385 ادام ءولىم قۇشقان.

"The Qazaq Times"