قىتاي دەنساۋلىق ساقتاۋ مينيسترلىگى ەلدە تاراپ جاتقان قاۋىپتى ۆيرۋستىڭ اۋقىمى كەڭەيە ءتۇسۋى مۇمكىن ەكەنىن مالىمدەدى. قىتاي دەنساۋلىق ساقتاۋ تارماقتارىنىڭ ماماندارى جاڭا ۆيرۋسقا «2019-nCoV» دەگەن ات قويعان.

قىتاي ۇكىمەتى ۆيرۋستىڭ جالعاستى تارالۋىن توقتاتۋ ءۇشىن قوسىمشا شارالاردى ىسكە قوستى. كەشە عانا جاريا بولعان رەسمي مالىمەتتەردە ۆيرۋس جۇقتىرعاندار سانى 200 اينالاسىندا دەپ كورسەتىلگەن ەدى. بۇگىنگى مالىمەتتەردە ونىڭ 440 ادامعا جەتكەنى ءمالىم بولدى. قىتايدىڭ ۇلتتىق دەنساۋلىق ساقتاۋ كوميسسياسى ۆيرۋستىڭ تارالۋ جاعدايى «قاۋىپتى شەككە جەتكەنىن» مويىندادى.

كەشە عانا بەيجىڭ تارابى رەسمي مالىمدەمە ارقىلى ۆيرۋستىڭ ادامنان ادامعا جۇعاتىنىن راستاعان. بىراق، ينفەكتسيانىڭ نەدەن، قالاي پايدا بولعانى تۋرالى انىق مالىمەت جوق. دۇنيەجۇزىلىك دەنساۋلىق ساقتاۋ ۇيىمى بولسا قىتايدان توتەنشە جاعداي جاريالاۋدى تالاپ ەتىپ وتىر. بۇل تۋرالى شەشىم بۇگىن بەلگىلى بولۋعا ءتيىس ەدى.

قىتايعا كورشىلەس بىرقاتار ەلدەر ۋحان قالاسىنان كەلگەن جولاۋشىلاردى تەكسەرۋدەن وتكىزىپ جاتىر. ءتىپتى، الىس قۇرىلىقتاعى امەريكا قۇراما شتاتتارى دا ءۇش ۇلكەن حالىقارالىق اۋەجايىندا تەكسەرۋ شاراسىن ىسكە قوستى. بۇعان دەيىن، تايلاند پەن جاپونياعا بارعان جولاۋشىلاردان اتالعان ۆيرۋستى جۇقتىرعاندار انىقتالعان ەدى.

“The Qazaq Times”