Qıtay Densaulıq saqtau ministrligi elde tarap jatqan qauipti virustıñ auqımı keñeye tüsui mümkin ekenin mälimdedi. Qıtay densaulıq saqtau tarmaqtarınıñ mamandarı jaña virusqa «2019-nCoV» degen at qoyğan.

Qıtay ükimeti virustıñ jalğastı taraluın toqtatu üşin qosımşa şaralardı iske qostı. Keşe ğana jariya bolğan resmi mälimetterde virus jwqtırğandar sanı 200 aynalasında dep körsetilgen edi. Bügingi mälimetterde onıñ 440 adamğa jetkeni mälim boldı. Qıtaydıñ Wlttıq densaulıq saqtau komissiyası virustıñ taralu jağdayı «qauipti şekke jetkenin» moyındadı.

Keşe ğana Beyjiñ tarabı resmi mälimdeme arqılı virustıñ adamnan adamğa jwğatının rastağan. Biraq, infekciyanıñ neden, qalay payda bolğanı turalı anıq mälimet joq. Düniejüzilik Densaulıq saqtau wyımı bolsa Qıtaydan tötenşe jağday jariyalaudı talap etip otır. Bwl turalı şeşim bügin belgili boluğa tiis edi.

Qıtayğa körşiles birqatar elder Uhan qalasınan kelgen jolauşılardı tekseruden ötkizip jatır. Tipti, alıs qwrılıqtağı Amerika Qwrama Ştattarı da üş ülken halıqaralıq äuejayında tekseru şarasın iske qostı. Bwğan deyin, Tayland pen Japoniyağa barğan jolauşılardan atalğan virustı jwqtırğandar anıqtalğan edi.

“The Qazaq Times”