بوتانيكالىق باقتىڭ كۇزگى كورىنىسى. فوتو: اشىق دەرەككوز

ورمان شارۋاشىلىعى جانە جانۋارلار دۇنيەسى كوميتەتىنىڭ ءباسپاسوز حاتشىسى ساكەن دىلداحمەت ءوزىنىڭ facebook پاراعىندا الماتىداعى نەگىزگى بوتانيكالىق باق ەكولوگيا، گەولوگيا جانە تابيعي رەسۋرستار مينيسترلىگىنە بەرىلگەنىن حابارلادى.  

«قازاقستان رەسپۋبليكاسى ۇكىمەتىنىڭ 2019 جىلعى 20 جەلتوقسانداعى №951 قاۋلىسىمەن قازاقستان رەسپۋبليكاسىنىڭ ءبىلىم جانە عىلىم مينيسترلىگى عىلىم كوميتەتىنىڭ «بوتانيكا جانە فيتوينترودۋكتسيا ينستيتۋتى (باس بوتانيكالىق باق)» قازاقستان رەسپۋبليكاسى ەكولوگيا، گەولوگيا جانە تابيعي رەسۋرستار مينيسترلىگىنىڭ ورمان شارۋاشىلىعى جانە جانۋارلار دۇنيەسى كوميتەتىنىڭ قاراماعىنا بەرىلدى»، – دەپ جازدى ءباسپاسوز وكىلى.

وسىعان دەيىن بوتانيكالىق باق ءبىلىم جانە عىلىم مينيسترلىگىنىڭ قاراماعىندا بولعان. رەسپۋبليكالىق بالانستاعى نىسان ەرەكشە قورعالاتىن تابيعي اۋماقتار تىزىمىنەن شىعارىلمايتىن بولدى.

بۇگىنگى تاڭدا بوتانيكالىق باقتا باتىس جانە سولتۇستىك پاۆيلونداردىڭ قۇرىلىسى اياقتالدى. بيىل قايتا جوندەۋ جۇمىستارى تولىعىمەن اياقتالماق. باق اۋماعىندا سيرەك كەزدەسەتىن مىڭداعان اعاش-بۇتا مەن گۇل تۇرلەرى وتىرعىزىلىپ جاتقان كورىنەدى.

1932 جىلى قۇرىلعان باق بوتانيكا جانە فيتوينترودۋكتسيا ينستيتۋتىنىڭ قۇرامىنداعى عىلىمي-زەرتتەۋ مەكەمەسى ەكەنى بەلگىلى. ەسەنتاي جانە ۇلكەن الماتى وزەندەرىنىڭ ارالىعىندا ورىن تەپكەن باس بوتانيكالىق باقتا جەرگىلىكتى جانە باسقا جەرلەردەن اكەلىنگەن وسىمدىكتەردىڭ 5,5 مىڭداي ءتۇرى مەن سورتى (ونىڭ 100-گە جۋىق ءتۇرى قازاقستاننىڭ «قىزىل كىتابىنا» ەنگەن) بار. اۋماعى 104 گا قۇرايتىن باقتىڭ رەكونسترۋكتسيالىق جۇمىسىن قازاقستانداعى ەڭ باي ادامداردىڭ ءبىرى بولات وتەمۇراتوۆتىڭ قايىرىمدىلىق قورى جۇرگىزىپ كەلەدى.

 “The Qazaq Times”