الاتاۋدىڭ ەڭىسى جازىلعان ءدال ەتەگىندەگى بوتانيكالىق باقتان بەرەكە كەتكەلى قاشان؟! يت سۇيرەگەن تۋلاقتاي جۇلىم-جۇلىم بولعان ورىندى وسىعان دەيىن تالاي قارجىگەر قۇلپىرتپاق ەدى. ءتىپتى، جوبالارىن قاعازعا ءتۇسىرىپ، شەندىلەرگە تانىستىرىپ تا جاتتى. مۇنى ەستىگەن جۇرتتىڭ بوركىن اسپانعا اتقانى بار. بىراق باۋ-شارباقتىڭ شىرايىن كەلتىرەمىن دەۋشىلەردەن سول كۇيى "اقجولتاي" حابار ەستىمەدىك. جەلپىنە جەڭ تۇرگەندەردىڭ ءۇنى شىقپاي قالدى، سولىڭقى باق تا سول كۇيى تۇرلەنبەدى.

الماتىداعى بوتانيكالىق باقتىڭ جالپى اۋماعى 100 گەكتارعا جۋىقتايدى. وندا قىزىل كىتاپقا ەنگەن وسىمدىكتەردىڭ 5 مىڭداي ءتۇرى كەزدەسەدى. بىراق باققا باس-كوز بولاتىن ادام تاياۋدا تابىلماسا، وندا تابيعاتتىڭ وسىناۋ تارتۋىن تالعاجاپ بىتەتىن ءتۇرىمىز بار.

فوتو: QT

بوتانيكالىق باق - ءبىلىم جانە عىلىم مينيسترلىگىنىڭ قاراۋىندا. ويتكەنى، ول تەك الەمدە سيرەك كەزدەسەتىن وسىمدىكتەر شوعىرلانعان ورىن عانا ەمەس، سونداي-اق ول - عىلىم ورداسى سانالادى. مۇندا تالاي تىڭ زەرتتەۋلەر جاسالىپ، نەبىر جاڭالىق تا اشىلعان.

سونىمەن قاتار، بوتانيكالىق باق الماتى قالاسىنىڭ اۋماعىندا ورنالاسقاندىقتان، وعان قالا بيلىگى دە جاۋاپتى. الايدا توردە وتىرعانداردىڭ بۇعان باس اۋىرتقىسى كەلمەيتىن سىندى. ايتپەسە، كوز قىرىن سالار بولسا،  ايگىلى باق قازىرگىدەي ءمۇساپىردىڭ كۇيىن كەشپەس ەدى.

سەرجان جۇماشوۆ، كاسىپكەر. فوتو: forbes.kz

باۋىرجان بايبەك باسقاراتىن قالالىق كەڭەس جاداۋلانعان باقتىڭ جايىن وسىدان بىرەر جىل بۇرىن ءسوز ەتكەن-ءدى. 2015 جىلى بەلگىلى كاسىپكەر سەرجان جۇماشوۆ ول جەرگە مۋزەي تۇرعىزامىن دەپ، جەلپىنىپ ەدى. ءتىپتى، يسپانيادان ايگىلى ساۋلەتشىنى شاقىرىپ، بۇل ءىستى تاياۋدا تىندىرۋعا ۋادە بەرگەن. كەيىن، ءبىر جىل وتكەندە كەڭەسكە قايتا كەلىپ، قوسىمشا ويلارىمەن ءبولىستى. ول ۇسىنعان جوبا بويىنشا بوتانيكالىق باقتا جاڭا ورانجەرەيالار، كليماترون، جىلىجايلار جانە مۇسىندەر باعى اشىلاتىن بولعان. بىراق سول جيىندا ايتىلعان ءسوز - ءىس جۇزىندە ناقتى جۇزەگە اسپادى.

سەرجان جۇماشوۆ سالماق بولعان مۋزەيدىڭ نوبايى. فوتو: buro247.kz

ينۆەستورلار بوس ۋادە بەردى دەلىك، بىراق قالا باسشىلىعى مۇنداي سالعىرتتىققا نەلىكتەن كوز جۇمىپ وتىرا بەرەدى؟ قارجىگەرلەر قۇلىقسىز بولسا، قالا بيلىگى ارەكەتتەنبەي مە؟ الدە بەرەكەسى كەتكەن الگى باققا ادەيى اراشا تۇسپەي وتىر ما؟

شىنتۋايىندا، الماتىداعى باس بوتانيكالىق باق - مەملەكەتتىك قورعاۋعا الدەقاشان الىنعان.  قاعاز كۇيىندە عانا قورعالعانى بولماسا، "قازىناعا" قارايلاپ جاتقان ەشكىم جوق. جاۋاپتىلار توڭىرەكتى تەگىس قورشاعانىمەن،  ىشىندەگى وسىمدىك بىتكەن جاپىرىلىپ جاتىر. سوندىقتان بۇل ماسەلە جۋىردا شەشىمىن تاپپاسا، "قالا جاقۇتىن" جوعالتىپ الۋىمىز بەك مۇمكىن...

“The Qazaq Times”