اقش سولتۇستىك كورەيانى استىرتىن قولداعانى ءۇشىن قىتايعا قىسىم كورسەتپەك

اقش جانە ازيا ەلدەرىنىڭ لاۋازىمدىلارىنىڭ ايتۋىنا قاراعاندا، سولتۇستىك كورەيانىڭ قارۋ-جاراقتى دامىتۋىنا قىتاي كاسىپورىندارىنىڭ قولداۋ كورسەتۋى ارتىپ بارادى. سوعان جاۋاپ رەتىندە، ترامپ ۇكىمەتى قىتاي كومپانيالارىنا ايىپپۇل كولەمىن ارتتىرۋدى قاراستىرىپ وتىر. بۇل تۋرالى اقش-تاعى تانىمال «The Wall Street Journal» باسىلىمى حابارلاپ وتىر.

اقش ۇكىمەتىنىڭ بۇل قارارى، وسى اپتاداعى اقش مەملەكەتتىك حاتشىسى تيللەرسوننىڭ سولتۇستىك شىعىس ازياداعى ساپارىنىڭ كۇن تارتىبىنەن دە ورىن الدى. ول جاپونيا، كورەيا، قىتاي ساپارى بارىسىندا ءۇش ەلدىڭ باسشىلارىمەن وتىرىستا، بۇل ماسەلەلەرىن بيىك كوتەرمەك. سولتۇستىك كورەيانىڭ يادرولىق قارۋلارى مەن بالليستيكالىق زىمىراندارىن تەجەۋگە باعىتتالعان ساياساتتى ورنىقتىرىپ كەتپەكشى.

تيللەرسوننىڭ ساپارى شىعىس ازياعا ترامپ ۇكىمەتىنىڭ العاشقى جوعارى ديپلوماتيالىق قادامى ەكەنىن بۇرىن دا ايتقان ەدىك. ول قازىر شىعىس ازيا ەلدەرى مەن اقش اراسىنداعى ديپلوماتيانىڭ قىلداي نازىك ەكەنىن سەزىنىپ وتىر دەۋگە بولادى. اقش لاۋازىمدىلاردىڭ ايتۋىنشا، اقش ۇكىمەتى سولتۇستىك كورەي باسشىسى كيم چەن ىننىڭ سوڭعى ايلارداعى قارۋ سىناۋ ارەكەتتەرىن جازالاۋدا قىتايدىڭ قولداۋىنا بارىنشا ۇمىتكەر. بىراق قىتاي كاسىپورىندارى، قارجىگەرلەرى، ۇيىمداسقان توپتار سولتۇستىك كورەيانىڭ قارۋ-جاراق دامىتۋىنا قولداۋ كورسەتىپ وتىرعان جاعدايدا، ۋاشينگتوننىڭ (ۆاشينگتون) بەيجىڭنەن قولداۋ تىلەپ قاراپ وتىرماسى انىق.

بۇۇ، اقش ۇكىمەتى جانە جەكەلىك بارلاۋ كوميتەتى جاقىندا ءبىر قاتار باياندامالار مەن قۇقىقتىق قۇجاتتاردى جاريالادى. وندا سولتۇستىك كورەيانىڭ قىتاي كاسىپ ورىندارىمەن ەركىن بايلانىس جاساۋى قىتاي اۋماعىندا كورەيا الدىنعى كومپانيالاردىڭ قارۋ-جاراق جابدىقتارىن ەركىن تاسىمالداۋى سىندى ارەكەتتەردىڭ تولىق ءتىزىمى قامتىلعان. قىتايدىڭ بۇل ارەكەتتەرى، سوڭعى بىرنەشە ايدا، ترامپ پەن وباما ۇكىمەتىنىڭ بىرنەشە قىتايلىق كومپانياعا ايىپپۇل مەن سانكتسيا سالۋىنا سەبەپ بولدى. ترامپ كومانداسىنداعى شەنەۋنىكتەر الدە قاشان ۇسىنىس جاساپ، قىتاي سولتۇستىك كورەيانىڭ قارۋ-جاراقتى دامىتۋ ىسىنە بەيرەسمي قولداۋ كورسەتۋىن توقتاتپاسا، اقش قىتايعا ەكونوميكالىق، قارجىلىق قىسىم تۇسىرەمىز دەپ وتىر.

قىتايدىڭ ۋاشينگتونداعى باس ەلشىلىگى بۇل قاتارلى ىسكە جاۋاپ بەرمەي وتىر. الايدا، بەيجىڭ تارابى سولتۇستىك كورەيانىڭ كومىر يمپورتىن تەجەۋ ارقىلى بۇۇ سالعان سانكتسيانى ازايتۋعا تىرىسۋدا. بۇل موڭعوليادان سولتۇستىك كورەياعا كىرەتىن كومىر تاسىمالىنا ءدالىز بەرمەي وتىرعانى. ونىسى موڭعوليا مەن كورەيانى بىردەي ءوز دەگەنىنە كوندىرۋ ءۇشىن بولسا كەرەك.

“The Qazaq Times”