ن.نازارباەۆ اۋعانستان پرەزيدەنتىمەن تەلەفون ارقىلى سويلەستى

اڭگىمە بارىسىندا تاراپتار ەكىجاقتى قارىم-قاتىناستىڭ قازىرگى جاعدايى مەن پەرسپەكتيۆالارىن تالقىلادى. كوشباسشىلار اۋعانستان يسلام رەسپۋبليكاسىنىڭ پرەزيدەنتى موحامماد اشراف عانيدىڭ قازاقستانعا 2015 جىلعى قاراشاداعى رەسمي ساپارىنىڭ قورىتىندىسى بويىنشا قول جەتكىزىلگەن ۋاعدالاستىقتاردىڭ ىسكە اسىرىلۋ بارىسىنا كوڭىلدەرى تولاتىنىن جەتكىزدى. اتاپ ايتقاندا، سوڭعى ۋاقىتتا ءوزارا تاۋار اينالىمىنىڭ كولەمى ايتارلىقتاي ارتقانى بايقالىپ وتىر. بۇل تۋرالى اقوردانىڭ رەسمي سايتى حابارلادى. 

مەملەكەتتەر باسشىلارى بيىلعى 12 اقپاندا قازاقستان مەن اۋعانستان اراسىندا ديپلوماتيالىق قارىم-قاتىناس ورناعانىنا 25 جىل تولۋىنا وراي ءبىرىن-ءبىرى قۇتتىقتادى.

سونداي-اق، تاراپتار قازاقستان رەسپۋبليكاسىنىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە اۋعانستان جونىندەگى كوميتەتتىڭ توراعاسى ەكەنىن ەسكەرىپ، اۋعانستانداعى احۋالدى تالقىلادى.

اۋعانستان پرەزيدەنتى بيىل استانادا وتەتىن شانحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسى وتىرىسىنا، يسلام ىنتىماقتاستىق ۇيىمىنىڭ عىلىم جانە تەحنولوگيالار جونىندەگى سامميتىنە قاتىساتىنىن راستادى.

تەلەفون ارقىلى سويلەسۋگە اۋعانستان جاعى باستاماشى بولدى.

“The Qazaq Times”