ۆلاديمير زەلەنسكي ۋكراينا حالقىنىڭ الدىندا انت قابىلدادى

ۆلاديمير زەلەنسكي ۋكراينا حالقىنىڭ الدىندا انت قابىلدادى.

مامىر ايىنىڭ 20-ى كۇنى جوعارى رادادا ۆلاديمير زەلەنسكيدىڭ ۇلىقتاۋ ءراسىمى ءوتتى. وعان ۋكراينانىڭ ەكس-پرەزيدەنتتەرى لەونيد كراۆچۋك، لەونيد كۋچما، ۆيكتور يۋششەنكو جانە پەتر پوروشەنكو قاتىستى.

انت قابىلداۋ راسىمىنەن كەيىن ءسوز سويلەگەن ۆلاديمير زەلەنسكي ۋكرايناداعى الەۋمەتتىك ماسەلەلەرگە توقتالدى.

«ۇكىمەت ءبىزدىڭ ماسەلەمىزدى شەشپەيدى. ۇكىمەتتىڭ ءوزى – ءبىزدىڭ ماسەلەمىز. پارلامەنتتە كەلەشەك ۇرپاقتىڭ قامىن ويلايتىندار عانا وتىرۋى كەرەك» - دەپ مالىمدەدى.

جاڭا پەرزيدەنت جوعارى رادادان دەپۋتاتتاردىڭ تيىسپەۋشىلىك مارتەبەسىن الىپ تاستاۋدى، ۋكراينا قاۋىپسىزدىك قىزمەتىنىڭ باسشىسىن، قورعانىس ءمينيسترى مەن باس پروكۋروردى قىزمەتىنەن كەتىرۋدى سۇرادى جانە بۇل ماسەلەنى شەشۋ ءۇشىن حالىق قالاۋلىلارىنا ەكى اي ۋاقىت بەردى.

بۇدان بولەك ۆلاديمير زەلەنسكي الەمدەگى بارلىق ۋكراينالىقتاردى بىرىگۋگە شاقىردى.

«ءبىز بىرىگۋىمىز كەرەك. سول كەزدە عانا مىقتى بولامىز. الەمدەگى بارلىق ۋكراينالىقتارعا ايتارىم – ءبىز 65 ميلليونبىز. سىزدەر بىزگە كەرەكسىزدەر، مىقتى دا قۋاتتى ۋكراينانى قۇرۋعا ارقايسىڭىز قاجەتسىزدەر. سىزدەرگە ۋكراينا ازاماتتىعىن بەرۋگە ۋادە بەرەمىن. بۇل – ءبىزدىڭ ۇلتتىق يدەيامىز» - دەپ مالىمدەدى زەلەنسكي.

ۇلىقتاۋ راسىمىنە اقش، كانادا، لاتۆيا، ليتۆا، ەستونيا، گرۋزيا، ءازىربايجان، مولدوۆا، پولشا، سلوۆاكيا ەلدەرىنىڭ وكىلدەرى قاتىستى. قازاقستان اتىنان يناۋگۋراتسياعا پارلامەنت سەناتى توراعاسىنىڭ ورىنباسارى  بەكتاس بەكنازاروۆ باردى.

ۋكراينادا پرەزيدەنت سايلاۋىنىڭ ەكىنشى كەزەڭى ءساۋىر ايىنىڭ 21-ءى كۇنى وتكەن. وندا ۆلاديمير زەلەنسكي حالىقتىڭ 73,2 پايىز داۋىسىن الىپ، جەڭىسكە جەتكەن. ونىڭ باستى قارسىلاسى پەتر پوروشەنكو سايلاۋ ناتيجەسىن مويىندايتىندىعىن جانە الداعى پرەزيدەنت سايلاۋىنا قاتىساتىندىعىن مالىمدەگەن.

"The Qazaq Times"