اقپارات جانە كوممۋنيكاتسيالار ءمينيسترى داۋرەن اباەۆ. فوتو: sputniknews.kz

اقپارات جانە كوممۋنيكاتسيالار ءمينيسترى داۋرەن اباەۆ تاعى ءبىر تىڭ جاڭالىعىمەن ءبولىستى. ەندى قازاقستاندا مەملەكەتتىك ورگاندار ءۇشىن بىرىڭعاي سايت قانا جۇمىس ىستەيدى، ال قالعاندارى جابىلادى. 

اتالعان جۇيەگە مەملەكەتتىك ورگاندار پورتالدارى مەن وڭىرلىك اكىمدىكتەردىڭ پورتالدارى كىرمەك.

مينيسترلىك كوللەگياسىنىڭ كەڭەيتىلگەن وتىرىسىندا: "بيىل ءبىز مەملەكەتتىك ورگاندار ءۇشىن بىرىڭعاي gov.kz ينتەرنەت-پورتالىن قۇراستىرامىز. ءجۇزدىڭ ورنىنا ءبىر سايت. بارلىق قارجىلاندىرۋ جابىلادى جانە تەك جالعىز پورتال اياسىندا بولادى. بۇل پورتال قازىر تەستىلەۋدەن ءوتىپ جاتىر. ول ءبىرىنشى كەزەكتە تۇتىنۋشىلاردىڭ مۇددەسى ءۇشىن جۇمىس ىستەيتىن بولادى. بۇكىل مينيسترلىك پەن مەملەكەتتىك قىزمەتتەر سوندا بولادى. ارنايى ءبولىم جاڭالىقتاردىڭ جاڭارتىلۋىن باقىلايتىن بولادى. وسىنىڭ بارلىعى قوعامدىق سوتقا شىعارىلادى جانە مەنىڭ ويىمشا بۇل ساۋىردە بولادى", - دەدى اباەۆ.

وسىلايشا، مەملەكەتتىك سايتتاردى ۇستاۋعا جۇمسالاتىن ميلليارد تەڭگەنى ۇنەمدەۋگە تىرىسقان مينيستر، مۇنىڭ ءتيىمدى ەكەندىگىن ايتىپ وتىر.

"بىرتە-بىرتە ەكى جىل ىشىندە ءبىز قالعان بارلىق مەملەكەتتىك سايتتاردى جابامىز. بۇل قاراجاتتى ايتارلىقتاي ۇنەمدەۋ بولىپ تابىلادى جانە ساپا وسەدى. مەملەكەتتىك ورگاندار تەحنيكالىق مىندەتتەر ءۇشىن ەمەس، جاڭارتۋ ءۇشىن ەمەس، كونتەنت ءۇشىن جاۋاپ بەرەتىن بولادى. مينيسترلىك ەكى بولىككە جاۋاپ بەرەدى: جاڭالىقتار مەن كورسەتىلەتىن مەملەكەتتىك قىزمەتتەر ءۇشىن", - دەگەن مينيستر، بۇل شەشىمنىڭ رەۆوليۋتسيالىق ەكەنىن ايتىپ، اقپاراتقا قولجەتىمدىلىكتى جاقسارتاتىندىعىن العا تارتتى.

ساراپشىلاردىڭ پىكىرىنشە، اباەۆتىڭ مۇنداي ۇسىنىسى ءبىر جاعىنان وتە ورىندى. سەبەبى، قازىرگى تاڭدا تۇرعىنداردىڭ باسىم بولىگى كەرەك اقپاراتتاردى باق وكىلدەرى مەن الەۋمەتتىك جەلىلەردەن جىلدام الادى. ونىڭ ۇستىنە قانداي دا ءبىر وقيعا بولعان كەزدە ءۇنسىز وتىراتىن بيلىكتەگىلەردىڭ پورتالدارى بەلسەندى تۇردە جۇمىس ىستەپ وتىر دەۋگە كەلمەيدى.

الايدا، تاعى ءبىر كەرەعار تۇسى دا بار ەكەندىگى راس. ويتكەنى، ءاربىر مەملەكەتتىك ورىننىڭ پورتالدارىنا تۇرعىندار ءوز شاعىمدارىن جولداۋىنا مۇمكىن بولعان. ەندى بىرىڭعاي سايت بۇل تۇرعىدا قالاي بولاتىندىعى بەلگىسىز. جان ايقايىن جەكە پورتالدارعا جازىپ جەتكىزە الماي جاتقان جۇرتشىلىق، كەرى بايلانىس بولمايدى دەپ بەزەك قاعۋدا.

"The Qazaq Times"