فوتو: ازاتتىق راديوسى

يران سوڭعى 40 جىلدا بولماعان ەكونوميكالىق قيىندىقتارعا تاپ بولدى.

يران پرەزيدەنتى حاسان رۋحاني اياتوللا رۋحوللا حومەنەي اتىنداعى مەشىتتە ءسوز سويلەدى.

«بۇگىنگى تاڭدا ءبىزدىڭ ەلىمىز سوڭعى 40 جىلدا بولماعان ەكونوميكالىق قيىندىقتارعا تاپ بولدى. ءبىز اقش جانە ونىڭ جاقتاستارىنىڭ قىسىمىمەن بەتپە-بەت كەلدىك. بۇندا يسلام جۇيەسى مەن ادال ۇكىمەتتىڭ كىناسى جوق. ءبىز بىرگە بولساق، بۇل قيىندىقتان دا وتەمىز. اقش سوڭعى رەت انتي يراندىق قادامدار جاساۋ ارقىلى ساتسىزدىككە ۇشىرادى. اياتوللا ءالي حومەنەيدىڭ ارتىنان ەرگەن بىزگە ەشكىم زيان كەلتىرە المايدى» - دەدى رۋحاني.

2018 جىلدىڭ 6 تامىزىندا اقش پرەزيدەنتى دونالد ترامپ يرانعا سالىنعان سانكتسيالاردى قايتادان قالپىنا كەلتىرۋگە بايلانىستى قۇجاتقا قول قويعان. اق ءۇي اكىمشىلىگى ءوزىنىڭ بۇل قادامىن رەسمي تەھراننىڭ يادرولىق كەلىسىمدى تولىققاندى ورىنداماۋىمەن تۇسىندىرگەن.

"The Qazaq Times"