قارجى مينيسترلىگى. فوتو: minfin.gov.kz

مەملەكەتتىك ورگانداردا ساقتالعان قۇجاتتاردان 4,7 ميلليون قاتە تۇزەلگەن. بۇل تۋرالى قارجى ءمينيسترى ءاليحان سمايلوۆ مالىمدەدى.

جيىندا ءسوز العان ءماجىلىس دەپۋتاتى تاتيانا ياكوۆلەۆا بيلىكتىڭ باسقارۋىنداعى ەلەكتروندى سايتتاردان، مەملەكەتتىك كىرىس كوميتەتىندە جانە شەكارالىق بولىمدەردەگى عالامتور جەلىلەرىنەن قاتە اقپاراتتاردى بىرنەشە رەت كوزى شالعاندىعىن جەتكىزدى.

«شىن مانىندە بىرنەشە رەت قاتە ساندارمەن ۇشىراستىم. ونداعى ەڭ ماڭىزدىسىنا توقتالار بولسام، 2018 جىلى بانكتەر سالىقتىق قارىزى بار ازاماتتاردىڭ ناقتى قانشا ەكەندىگىن كورسەتە المادى. وسىعان بايلانىستى كوپتەگەن ازاماتتار بانكتىك ەسەپشوتتار اشا الماي، نەسيە الا الماي ءبىراز اۋرە-سارساڭعا تۇسكەندىگى بەلگىلى. ياعني، اقپاراتتىڭ از ءارى ناقتى ەمەس بولۋىنا بايلانىستى سالىقتى مەرزىمىندە تولەپ وتىرعاندار اقپاراتتىق جۇيەنىڭ تۇتقىنىنا اينالىپ وتىر» دەپ تاتيانا ياكوۆلەۆا ءوزىنىڭ پىكىرىن ءبىلدىردى.

ال، بۇل سۇراققا جاۋاپ بەرۋگە تىرىسقان ءاليحان سمايلوۆ: «ءبىز بىلتىر وسى قيىندىققا تاپ بولعاننان كەيىن، جاڭارتۋ بارىسىندا ۇلكەن جۇمىستار اتقاردىق. 5 ميلليونعا جۋىق قاتەلەر تۇزەلدى. سونىمەن بىرگە تاعى دى 300 مىڭداي قاتە بار دەپ بولجاپ وتىرمىز. مۇنىڭ بارلىعى سالىق تولەمىنە قاتىستى اقپاراتتار دايىن بولعان كەزدە تۇزەتىلەدى».

بۇدان كەيىن، قارجى مينيسترلىگى سالىق تولەۋشىلەردىڭ كۇتپەي-اق، اقپاراتتاردى جوندەۋگە وزدەرى كىرىسەتىندىگىن جەتكىزدى. سوندىقتان ەندى جەرگىلىكتى اتقارۋ ورىندارىن دا ىسكە قوسۋ قاراستىرىلعان.

بۇل قارجى مينيسترلىگىنىڭ قاتەلىگىنە بايلانىستى العاش رەت ايتىلىپ وتىرعان داۋ ەمەس. بۇدان بۇرىن گۇلجان قاراعۇسوۆا دا ەلەكتروندى جۇيەدەگى ءتۇرلى قاتەلىكتەردىڭ سالدارىنان، كوپتەگەن ازاماتتار نەسيە الا الماي، شەت ەلگە شىعا الماي جۇرگەندىگىن جەتكىزگەن ەدى.

ساراپشىلاردىڭ سوزىنشە، جاپپاي ەلەكتروندى جۇيەگە كوشۋگە ىنتىققان بيلىكتەگىلەر، ەڭ الدىمەن وزدەرى ساۋاتتى بولۋى ءتيىس دەيدى. سونىمەن بىرگە، ءاربىر جاريالانعان اقپاراتتار ناقتى بولۋى شارت.  بۇدان بولەك مەملەكەتتىك جۇيەگە قاتىستى كەيبىر مالىمەتتەردى تابۋدىڭ ءوزى دە مۇمكىن ەمەس ەكەندىگىن جوققا شىعارمايدى. «كوش جۇرە تۇزەلەدى» دەگەنگە سالىپ بارلىعىن تياناقتى ورىنداماۋ، قايتا-قايتا كەرىگە ورالتا بەرەتىندىگى راس.

"The Qazaq Times"