سوروس قىتاي باسشىسىن سىنعا الدى. فوتو: New York Post.

«قىتاي باسشىسى الەمنىڭ ەركىندىك پروتسەسىنە قاۋىپ توندىرەدى». بۇنداي پىكىردى امەريكالىق ميللياردەر ءارى فيلانتروپ جورج سوروس داۆوستاعى دۇنيەجۇزىلىك ەكونوميكا فورۋمىندا ورتاعا سالدى. ونىڭ ايتۋىنشا، الداعى ۋاقىتتا قىتاي بيلىگى توتاليتارلىق جۇيەنى بەكەمدەۋ ماقساتىندا ەڭ جاڭا تەحنولوگيالار مەن جاساندى سانالاردى دا كەڭ كولەمدە پايدالانۋى مۇمكىن.

سوروس سوزىندە قىتاي بۇل ءىستى جۇزەگە اسىرۋ ءۇشىن وزگە توتاليتارلىق جۇيەدەگى ەلدەردەن قابىلەتتى ەكەنىن ايتادى. «قىتايدان باسقا اۆتوريتارلىق رەجيمدەگى مەملەكەتتەردىڭ بار ەكەنى راس. بىراق، قىتايدىڭ ەكونوميكاسى باي، ارمياسى قۋاتتى جانە تەحنولوگيا سالاسى مەيلىنشە دامىعان. سوندىقتان دا، شي جينپيڭ الەمدەگى باسقا اشىق قوعام ءۇشىن ەڭ ۇلكەن قاۋىپ توندىرەدى»، – دەيدى سوروس مىرزا.

ميللياردەر اتالعان فورۋمدا قىتاي باسشىسى عانا ەمەس، اقش پرەزيدەنتى دونالد ترامپتىڭ قىتايعا قاراتقان ساياساتىن دا اشىق سىنعا الدى. ترامپقا قاراتقان سوزىندە: «ترامپ الەممەن ەكونوميكالىق سوعىسقا بارۋدىڭ ورنىنا، ساۋدا سوعىسىن ءبىر عانا قىتايعا باعىتتاۋى كەرەك»، – دەيدى.

الەمنىڭ ەركىندىككە دەگەن تالپىنىسىنا قىتايدىڭ ءىرى تەحنولوگيا كومپانيالارى دا ۇلكەن قورقىنىش الىپ كەلىپ جاتقانىن ايتا كەلىپ، قىتاي بيلىگىنىڭ ەل ىشىندە جوعارى تەحنولوگيالاردى پايدالانا وتىرىپ، ەل حالقىن قاتاڭ باقىلاۋعا الىپ، كىسىلىك قاقىسىن شەكتەپ، ەركىندىگىنە تۇساۋ سالىپ وتىرعانىن سىنعا الدى.

جورج سوروس اقش-تىڭ دەموكراتيالىق پارتياسىن قولداۋشى «دوللاربايىنىڭ» ءبىرى. ول سونداي-اق، ءسوز بوستاندىعى، ادامدىق قۇقىقتى قورعاۋ جانە تاۋەلسىز باسپاسوزدەرگە قولداۋ كورسەتۋ بويىنشا ورتالىق ازيا ەلدەرىنە تانىس ەسىم.

“The Qazaq Times”