كيەۆتىڭ وبلون اۋداندىق سوتى ۋكراينانىڭ ەكس-پرەزيدەنتى ۆيكتور يانۋكوۆيچتى مەملەكەتكە وپاسىزدىق جاسادى دەپ تانىدى.

سوتقا جىبەرىلگەن قۇجاتتاردىڭ بىرىندە 2014 جىلدىڭ ءبىرىنشى ناۋرىزىندا يانۋكوۆيچ رەسەي فەدەراتسياسىنىڭ پرەزيدەنتى ۆلاديمير پۋتينگە ۋكراينا شەكاراسىنا اسكەر كىرگىزىپ، وككۋپاتسيا ارقىلى باسىپ الۋ تۋرالى ءوتىنىشى كورسەتىلگەن.

بۇدان بولەك لۋتسەنكو ۋكرايناعا اكەلگەن زارداپ توڭىرەگىندە دە ءسوز قوزعادى. ۋكراينا قاۋىپسىزدىك قىزمەتىنىڭ تاراۋى، ەلدەگى اقپاراتتىق قاۋىپسىزدىكتىڭ جويىلۋى، ەكونوميكاعا اكەلگەن زاردابى جانە جاۋ تاراپىنا ءوتىپ، ۋكراينا شەكاراسىنىڭ بىرتۇتاستىعىن ساقتاپ قالا الماعانى ءۇشىن ايىپتاپ وتىر.

الايدا، ءتىس قاققان ساياساتكەر مەن ونىڭ قورعاۋشىسى رەسەي باسشىسىنا ەشقانداي مۇقتاجدىق حاتىن جىبەرمەگەنىن ايتىپ اقتالۋدا.

بۇعان دەيىن بىرنىشە ايعا جالعاسقان تەرگەۋ كەزىندە ۋكراينانىڭ قازىرگى پرەزيدەنتى پەتر پوروشەنكو، ەكس-پرەمەر ارسەني ياتسەنيۋك، جوعارعى رادا سپيكەرى اندرەي پارۋبي، ءىىد باسشىسى ارسەن اۆاكوۆ جانە قاۋىپسىزدىك كەڭەسىنىڭ باسشىسى الەكساندر تۋرچينو كۋاگەر رەتىندە تەرگەۋگە ارالاسقان.  اۋەل باستان وسى تاقىرىپ توڭىرەگىندە 89 رەت سوت وتىرىسى ءوتتى. الايدا، اركەز سوڭعى ءسوزىن ايتۋ ءۇشىن شاقىرىلاتىن ەكس-پرەزيدەنت بەينەكونفەرەنتسياعا سول كۇيى شىققان جوق.

يانۋكوۆيچ 2014 جىلى رەسەيدىڭ ۋاقىتشا پانا بەرۋىنە بايلانىستى ۋكراينادان قاشقان  بولاتىن. ال، ونىڭ تەرگەۋ جۇمىستارى وتكەن جىلدىڭ ماۋسىم ايىندا باستالعان.

ەستەرىڭىزگە سالا كەتەيىك، ۋكرايناداعى ساياسي داعدارىس 2014 جىلى ەۋرووداق اسسوتسياتسياسىنا ۆيكتور يانۋكوۆيچتىڭ قول قويماۋىنان كەيىن پايدا بولدى.وسى تۇستا حالىق كيەۆتەگى مايداندا جاپپاي نارازىلىق شەرۋىنە شىعىپ وزدەرىنىڭ قارسىلىقتارىن كورسەتتى. بۇدان كەيىن يانۋكوۆيچ پەن ونىڭ جاقتاستارى قاراپايىم حالىققا وق اتىپ 100-دەن استام ادام قۇربان بولعان.

قازىرگى تاڭدا كىنالاۋشى تاراپ ۆيكتور يانۋكوۆيچتى 15 جىلعا باس بوستاندىعىنان ايىرۋدى سۇراپ وتىر. بىراق، ساياساتكەر ءوزىنىڭ كىناسىن مويىنداماۋدا.

"The Qazaq Times"