دايش اسكەرى يراك ازاماتتارىن ۇرلاي باستادى

دايش تەرروريستىك ۇيىمىنىڭ مۇشەلەرى يراكتىڭ كيركۋك اۋماعىنداعى 19 ادامدى ۇرلاپ كەتكەن. ولاردىڭ اراسىندا جەرگىلىكتى اكىمشىلىك وكىلى دە بار. بۇل تۋرالى انادولۋ حابارلاپ وتىر.

تۇرىك باسىلىمىنىڭ مالىمەتىنە سۇيەنسەك، دايش اسكەرلەرى كيركۋك اۋماعىنىڭ وڭتۇستىگىندە ورنالاسقان رەشاد اۋىلىنىڭ 13 تۇرعىنى مەن اۋىلشارۋاشىلىق تەحنيكالارىن قولدى ەتكەن.

بۇدان بولەك، يراكتىڭ دابا-ءال-ءجاديد اۋىلىنىڭ ەكى ازاماتى مەن بارا بارا اۋدانىنىڭ 4 تۇرعىنى دايش ۇيىمىنىڭ تۇتقىنىنا اينالعان.

وسىعان بايلانىستى يراك فەدەرالدى پوليتسيا قىزمەتكەرى حۇسەين ءمادجىت قازىرگى تاڭدا لاڭكەستىك توپتىڭ قاي جەرگە جاسىرىنعاندىعىن انىقتاۋ وپەراتسياسى ءجۇرىپ جاتقاندىعىن مالىمدەدى.

ەستەرىڭىزگە سالا كەتەيىك، وسىدان بىرنەشە كۇن بۇرىن دونالد ترامپ ءسۇريا ەلىندەگى دايش ۇيىمىن جەڭىپ، ءوز اسكەرىن ءسۇريادان شىعاراتىندىعىن مالىمدەگەن بولاتىن. ال، از عانا قالعان لاڭكەستىك توپ مۇشەلەرىن تۇركيا بيلىگى جوياتىنى تۋرالى ءسوز قوزعاعان. الايدا، اقش-تىڭ جاساعان مۇنداي مالىمدەمەسىنە وكىنىش بىلدىرگەن فرانتسيا باسشىسى ەممانۋەل ماكرون فرانتسۋز اسكەرىن ءالى دە بولسا ءسۇريا اۋماعىندا قالدىرۋعا شەشىم قابىلدادى. وسىلايشا، ءسۇريادان ىعىسا باستاعان دايش لاڭكەستىك توبىنىڭ مۇشەلەرى ەندى يراك ەلىنە قاراي باعىت العان سىڭايلى.

“The Qazaq Times”