اقش تۇركيانىڭ ءسۇريا اۋماعىندا اسكەري وپەراتسيالار جۇرگىزۋىنە قارسى

اقش تۇركيانىڭ ءسۇريا اۋماعىندا اسكەري وپەراتسيالار جۇرگىزۋىنە قارسى.

اقش قورعانىس مينيسترلىگىنىڭ رەسمي وكىلى شون روبەرتسون تۇركيا ارمياسىنىڭ ءسۇريانىڭ سولتۇستىك-شىعىسىندا اسكەري وپەراتسيالار جۇرگىزۋىنە قارسىلىق ءبىلدىردى.

«سولتۇستىك-شىعىس سۇرياداعى تۇركيا ارمياسىنىڭ اسكەري وپەراتسيالارى سول اۋماقتاعى اقش ساربازدارىنا قاۋىپ توندىرەدى. انكارانىڭ بۇل ارەكەتى ەشقانداي قيسىنعا كەلمەيدى. تۇركيانى قانداي دا ءبىر وپەراتسيانى جۇزەگە اسىرماس بۇرىن ەكىجاقتىق كەلىسسوزدەر وتكىزۋگە شاقىرامىز» - دەپ مالىمدەدى روبەرتسون.

ەستەرىڭىزگە سالايىق، جەلتوقسان ايىنىڭ 12-ءى كۇنى تۇركيا پرەزيدەنتى رەجەپ تايىپ ەردوعان «انكارا بىرنەشە كۇننەن كەيىن ءسۇريا كۇردتەرىنە قارسى ەفرات وزەنىنىڭ شىعىسىندا اسكەري وپەراتسياسىن باستايدى» - دەپ مالىمدەگەن. بۇعان دەيىن باق بەتتەرىندە «اقش انكارا مەن قارۋلى كۇرد جاساقتارى اراسىنداعى تەكەتىرەس ۋشىعىپ كەتپەس ءۇشىن، ءسۇريا مەن تۇركيا شەكارالىق اۋداندارىنا ارنايى باقىلاۋ بەكەتتەرىن ورناتۋدى جوسپارلاۋدا» دەگەن اقپارات تاراعان.

"The Qazaq Times"