وزبەكستاندا 1177 جوعارى لاۋازىمدى شەنەۋنىك كوررۋپتسياعا قاتىسى بار دەگەن كۇدىكپەن ۇستالعان. بۇل جونىندە وزبەكستان كونستيتۋتسياسى كۇنى قارساڭىندا وتكەن مەرەكەلىك شارادا مەملەكەت باسشىسى شاۆكات ميرزيەەۆ مالىمدەگەن.

«قۇقىق قورعاۋ ورگاندارى قانشالىقتى تىرىسقانىمەن، ازاماتتارىمىزعا قارسى جۇرگىزىلىپ جاتقان جيىركەنىشتى ءىس-ارەكەتتەر جويىلماي كەلەدى. قوعامدىق باقىلاۋ ارەكەتىنسىز جەمقورلىقپەن ءتيىمدى كۇرەسۋ مۇمكىن ەمەس. بۇل زۇلىمدىققا تەك قانا قۇقىق قورعاۋ ورگاندارى ەمەس، قوعام دا قارسى تۇرۋ كەرەك»، – دەدى شاۆكات ميرزيەەۆ.

ونىڭ سوزىنشە، ءاربىر مەملەكەتتىك مەكەمەدە جەمقورلىقپەن كۇرەسۋدە ءوزىنىڭ جەكە باعدارلاماسى بولۋ كەرەك، ال ونىڭ جۇزەگە اسۋىن قوعام باقىلاۋى ءتيىس.

وزبەك پرەزيدەنتى سونىمەن بىرگە اقش، رەسەي، ۇلىبريتانيا، بولگاريا، گرەكيا، لاتۆيا، ەستونيا سەكىلدى ەلدەردە جەمقورلىققا قارسى ارنايى كوميسسيا مەن كوميتەتتەر قىزمەت ىستەيتىنىن اتاپ ءوتتى.

«اتالعان تاجىريبەلەردى ەسەپكە الا وتىرىپ، ءارى ءبىزدىڭ كونستيتۋتسيادا تالاپ ەتىلگەندەي، ولي ءماجىلىس پالاتاسىنان جەمقورلىقپەن كۇرەس كوميتەتىن قۇرۋدى ۇسىنامىن. بۇل كوميتەت بارلىق دەڭگەيدەگى مەملەكەتتىك مەكەمەلەردە جەمقورلىقپەن كۇرەسۋگە بىرگە اتسالىسۋ كەرەك»، – دەدى پرەزيدەنت.

"The Qazaq Times"