مەن ۆانجوۋ فوتو: Delo.ua

قىتايلىق "Huawei" كومپانياسى باسشىسىنىڭ قىزى جانە قارجى ديرەكتورى مىڭ ۆانجوۋ ۆاشينگتوننىڭ سۇراۋى بويىنشا كانادا مەملەكەتىندە تۇتقىندالدى. بۇل تۋرالى كانادانىڭ ادىلەت مينيسترلىگى حابارلاپ وتىر.

مىڭ ۆانجوۋ امەريكانىڭ يران ەلىنە سالعان ساۋدا سانكتسياسىن ورىنداماعان ءۇشىن ءبىرىنشى جەلتوقسان كۇنى تۇتقىندالعان. اتالعان ازاماتشانىڭ جۇمىسى تۋرالى العاشقى سوت وتىرىسى 7 جەلتوقسانعا بەلگىلەندى. سونىمەن بىرگە، قىتاي كومپانياسىنىڭ قارجى ديرەكتورىن ەكستراديتسيالاۋ تۋرالى ۇكىمدى نيۋ-يوركتىڭ شىعىس وكرۋگىنىڭ سوتى قارايتىن بولادى.

تاعى ءبىر ايتا كەتەتىن جايت، قىتاي كومپانياسىنىڭ قارجى ديرەكتورى تۇتقىندالعاننان كەيىن، ازيالىق قور بيرجالارى مەن اقش بيرجا قورلارى بىردەن جاعىمسىز كەيىپ تانىتتى.

بەسىنشى قاراشا كۇنى اقش ەلى تەگەرانعا قارسى ەنەرگەتيكا سالاسىندا، تەڭىز جولى، قارجى سەكتورى بويىنشا ەكىنشى پاكەت سانكتسياسىن سالعان بولاتىن. اتالعان سانكتسيا بويىنشا يراننىڭ ۇلتتىق مۇناي كومپانياسىنىڭ ۇستەمدىگىن تومەندەتىپ، يران ەلىنىڭ ورتالىق بانك جانە وزگەدە بانكتەرىن شەت ەلدەردەگى قارجى ۇيىمدارىمەن ءتۇرلى وپەراتسيالار جاساۋ مۇمكىندىگىنەن ايىرعان. بۇدان بولەك، سانكتسيا يران پورتتارىن، تەڭىز تاسمالىن دا قامتيدى. سەگىزىنشى مامىر كۇنى اقش پرەزيدەنتى دونالد ترامپ ۆاشينگتوننىڭ يرانمەن جاساسقان يادرولىق قارۋ تۋرالى كەلىسىمىنەن شىعاتىندىعىن مالىمدەگەن. بۇدان كەيىن، بۇۇ-نىڭ حالىقارالىق سوتى ءبىر جاقتى سانكتسيا 1955 جىلى پايدا بولعان دوستىق، ەكونوميكالىق جانە كونۋسۋلدىق كەلىسىمنىڭ بۇزىلعاندىعىن ايتقان بولاتىن.

جاقىن كۇندەرى يران ەلىنىڭ كوشباسشىسى حاسان رۋحاني امەريكانىڭ سانكتسيالارى جالعاسا بەرسە، ورمۋز بۇعازىن جاۋىپ تاستايتىندىعىن مالىمدەگەن. قازىرگى تاڭدا قوس تاراپ تا بەيبىت كەلىسىمگە كەلۋگە اسىعار ەمەس.

“The Qazaq Times”