فوتو: راديو ازاتتىك

قىرعىزستان ءسىم قىتايدا قىسىم كورىپ جاتقان ەتنيكالىق قىرعىزدار جونىندە مالىمدەمە جاسادى.

«قىرعىزستان سىرتقى ىستەر مينيسترلىگى رەسمي ارنالار ارقىلى قىتايداعى ەتنيكالىق قىرعىزدارعا قاتىستى اقپاراتتى تەكسەرىپ جاتىر» دەپ مالىمدەدى قىرعىز ءسىم ءباسپاسوز حاتشىسى ۇلان ديحانباەۆ.

ەستەرىڭىزگە سالايىق، وتكەن اپتادا قىتايدا تۋىستارى جوعالىپ كەتكەن بىرنەشە قىرعىزستان ازاماتى پرەزيدەنت سوورونباي جەەنبەكوۆتەن كومەك سۇراعان. كەيىننەن قىتايداعى ەتنيكالىق قىرعىزداردى قورعاۋ كوميتەتى قۇرىلىپ، جاعدايدىڭ ءمان-جايىن حالىق پەن بيلىككە ءتۇسىندىرۋ ماقساتىندا جيىن وتكەن.

جەلتوقسان ايىنىڭ 5-ءى كۇنى بەلسەندىلەر بىشكەك قالاسىنداعى بىرىككەن ۇلتتار ۇيىمى عيماراتىنىڭ الدىندا حالىقارالىق قاۋىمداستىق وكىلدەرى مەن بۇۇ باس حاتشىسى انتونيۋ گۋتەررەشتەن قىتايدا قىسىم كورىپ جاتقان قىرعىز-قازاق ۇلتتارىنا اراشا سۇراعان.

قىتايداعى از ۇلتتاردىڭ جەرگىلىكتى بيلىك تاراپىنان قىسىم كورىپ جاتقاندىعى جونىندە وسىعان دەيىن حالىقارالىق باق بەتتەرىندە سان مارتە ايتىلعان. رەسمي بەيجىڭ وزىنە تاعىلعان ايپتاردىڭ بارلىعىن جوققا شىعارىپ، ساياسي ۇيرەنۋ ورتالىقتارىنداعى ادامداردىڭ بارلىعى ءوز ەركىمەن بارعاندىعىن العا تارۋدا. بولجام بويىنشا، قازىرگى تاڭدا قىتايداعى ساياسي ۇيرەنۋ لاگەرلەرىندە ءبىر ميلليونعا جۋىق ادام بار.

"The Qazaq Times"