كەڭەستەر وداعىنىڭ  العاشقى جانە سوڭعى پرەزيدەنتى ميحايل گورباچەۆ اقش پرەزيدەنتىنىڭ رەسەيمەن اراداعى زىمىران كەلىسىمىنەن شىعۋىنا بايلانىستى مالىمدەمەسىنە پىكىر ءبىلدىردى.

ميحايل گورباچەۆ ءوزىنىڭ «The New York Times» باسىلىمىنداعى كولونكاسىنا: «ساياسي نيەت بولسا كەز كەلگەن ماسەلەنى شەشۋگە بولادى. بىراق سوڭعى ەكى جىلدا اقش پرەزيدەنتى مۇلدە باسقا ماقساتتى كوزدەپ كەلەدى. ول امەريكا قۇراما شتاتتارىنا قويىلعان كەز كەلگەن مىندەتتەمەلەر مەن شەكتەۋلەردى الىپ تاستاماق. بۇل يادرولىق زىمىراندارعا قاتىستى دۇنيە عانا ەمەس. ترامپتىڭ زىمىران كەلىسىمىنەن باس تارتۋى جاڭا قارۋ جارىسىنىڭ باستالعانىن بىلدىرەدى» - دەپ جازدى.

وتكەن اپتادا اقش پرەزيدەنتى دونالد ترامپ رەسەيمەن اراداعى زىمىران كەلىسىمىنەن شىعاتىندىعىن مالىمدەگەن. ونىڭ سوزىنشە، رەسمي ماسكەۋ وسى ۋاقىتقا دەيىن وزىنە جۇكتەلگەن مىندەتتەردى ورىنداماي كەلگەن.

ترامپتىڭ مالىمدەمەسىنەن كەيىن رەسەي باسشىسى ۆلاديمير پۋتين «ەگەر كەلىسىمنىڭ بارلىعى جويىلاتىن بولسا، وندا قارۋلانۋعا شەكتەۋ قوياتىن ەشتەڭە قالمايدى. مەنىڭ ويىمشا، ءدال وسى كەزدە قاۋىپتى بولادى جانە قارۋلانۋدان باسقا امال قالمايدى» - دەپ مالىمدەگەن.

"The Qazaq Times"