ناتو: رەسەي زىمىران كەلىسىمىن ورىنداماي وتىر

ناتو باس حاتشىسى يەنس ستولتەنبەرگ: «رەسەي زىمىران كەلىسىمىنىڭ مىندەتتەرىن ورىنداماي وتىر» – دەپ مالىمدەدى.

قازان ايىنىڭ 24-ءى كۇنى ناتو باس حاتشىسى يەنس ستولتەنبەرگ اقش-تىڭ رەسەيمەن اراداعى زىمىران كەلىسىمىنەن شىعۋىنا قاتىستى پىكىر ءبىلدىردى. ول وندا: «رەسەي زىمىران كەلىسىمىندەگى وزىنە جۇكتەلگەن مىندەتتەردى ورىنداماي وتىر. ال اقش كەرسىنشە، كەلىسىم نەگىزىندە جۇمىس ىستەۋدە. بىراق كەلىسىم ورىندالۋ ءۇشىن بۇل جەتكىلىكسىز. ناتو جاڭا قارۋلانۋ جارىسى بولعانىن قالامايدى. اليانس مۇشەلەرى الداعى ۋاقىتتا اقش-تىڭ كەلىسىمنەن شىعۋ شەشىمىن تالقىلايتىن بولادى» - دەپ مالىمدەدى.

وتكەن اپتادا اقش پرەزيدەنتى دونالد ترامپ رەسەيمەن اراداعى زىمىران كەلىسىمىنەن شىعاتىندىعى جونىندە مالىمدەگەن. ونىڭ سوزىنشە، اق ءۇي اكىمشىلىگىنىڭ بۇنداي قادامعا بارۋىنا رەسەيدىڭ كەلىسىمدى ورىنداماۋى سەبەپ بولعان.

اقش پەن رەسەي اراسىنداعى زىمىران كەلىسىمىنە 1987 جىلى قول قويىلعان. كەلىسىم بويىنشا، قوس تاراپقا 500 جانە 5,5 مىڭ شاقىرىم قاشىقتىققا ۇشاتىن بالليستيكالىق زىمىرانداردى جاساۋعا تىيىم سالىنعان.

ماسكەۋ دە، ۋاشينگتون دا وسى ۋاقىتقا دەيىن ءبىر-ءبىرىن زىمىران كەلىسىمىن بۇزدى دەپ بىرنەشە رەت ايىپتاعان.

"The Qazaq Times"