قازاقستاننىڭ وزبەكستانداعى ەلشىسى "اسا ءىرى كولەمدە بيۋدجەت قارجىسىن جىمقىردى" دەگەن كۇدىككە ءىلىندى. جەرگىلىكتى اگەنتتىكتەردىڭ حابارلاۋىنشا، بۇل تۋرالى 16 قازاندا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى جاننا باستاروۆا مالىمدەدى.

"سىبايلاس جەمقورلىققا قارسى ءىس-قيمىل ۇلتتىق بيۋروسى قازاقستاننىڭ وزبەكستانداعى ەلشىسىنىڭ اسا ءىرى كولەمدە بيۋدجەت قارجىسىن جىمقىرعانىن اشكەرەلەدى. ول جاۋاپتى مەملەكەتتىك قىزمەت اتقارىپ تۇرىپ، قازاقستاننىڭ وزبەكستانداعى ەلشىلىگى عيماراتىن سالۋ بويىنشا اتقارىلعان جۇمىستار تۋرالى جالعان اكتىلەرگە بىلە تۇرا قول قويعان" دەدى باستاروۆا.

تەرگەۋ ەلشىنىڭ زاڭسىز ءىس-ارەكەتىنەن مەملەكەتكە 140 ميلليون تەڭگەدەن استام شىعىن كەلدى دەپ باعالاپ وتىر.

قازاقستان سىرتقى ىستەر مينيسترلىگىنىڭ ءباسپاسوز حاتشىسى ايبەك سمادياروۆ ەلشىگە قاتىستى تەرگەۋ جۇمىستارى مينيسترلىكتىڭ بۇرىنعى جاۋاپتى حاتشىسى اناربەك قاراشەۆكە قاتىستى ءىس اياسىندا جۇرگىزىلىپ جاتقانىن ايتتى.

سىبايلاس جەمقورلىققا قارسى قىزمەت ماۋسىمنىڭ 13-ىندە سىرتقى ىستەر مينيسترلىگىنىڭ بۇرىنعى جاۋاپتى حاتشىسى اناربەك قاراشەۆتى ء"ىرى كولەمدە پارا الدى" دەگەن كۇدىكپەن قاماۋعا الىنعانىن حابارلاعان.

اگەنتتىك وكىلى ەلشىنىڭ ۇستالعانى، يا باسقا دا تەرگەۋ شارالارى تۋرالى ايتپادى.

"The Qazaq Times"