ەردوعان يران مۇنايىنان باس تارتۋعا شاقىرعان ترامپقا جاۋاپ بەردى

تۇركيا اقش-تىڭ تەھرانعا قارسى سانكتسياسىنا بولا  يران گازىن يمپورتتاۋدى توقتاتپايدى. انكارانىڭ وسى ۇستانىمى تۋرالى تۇرىك پرەزيدەنتى رەجەپ تايىپ ەردوعان  رەيتەر اگەنتتىگىنە بەرگەن سۇحباتىندا ايتتى.

«بۇرىن باراك وباما كەزىندە (اقش-تىڭ بۇرىنعى پرەزيدەنتى — رەد.) وسىعان ۇقساس جاعداي (يران گازىنا قاتىستى) ورىن العان ەدى. ەگەر ءبىز ونى يمپورتتامايتىن بولساق، وندا قىستا حالقىمدى نەمەن جىلىتامىن؟ قازىرگى تاڭدا ءبىز گازدىڭ 50 پايىزىن رەسەيدەن، قالعان كولەمىن ءازىربايجاننان، يراننان، يراكتان جانە كەيدە الجيردەن جەتكىزەمىز. كەشىرىڭىزدەر، بىراق ءبىز حالقىمىزدىڭ مۇددەسىن باستى ورىنعا قويا وتىرىپ ارەكەت ەتەتىن بولامىز»، - دەدى ەردوعان اقش-تىڭ يراندىق بارلىق كومىرسۋتەك سالاسىنا قارسى سالىنۋى مۇمكىن سانكتسيالار تۋرالى سۇراققا جاۋاپ بەرە وتىرىپ. اقش-تىڭ 2015 جىلى جاسالعان يراننىڭ يادرولىق باعدارلاماسىنان شىعاتىنى تۋرالى حابارلاعاننان كەيىن ۋاشينگتون ۇستىمىزدەگى جىلدىڭ 4 قاراشاسىنان باستاپ تەھرانعا قارسى قاتاڭ سانكتسيالاردى قايتا جاڭارتۋعا ۋادە بەرگەن ەدى. سونىمەن قاتار، بارلىق وداقتاستارىن يراننان مۇناي ساتىپ الماۋعا شاقىرعان بولاتىن.  كەشە يران دا ءوز كەزەگىندە، باتىس ەۋروپا مەن اقش-قا مۇناي ترانسفەرىنىڭ نەگىزگى ءارى بىردەن-ءبىر جولى بولىپ تابىلاتىن ورمۋز بۇعازىن جاۋىپ تاستاۋى مۇمكىن ەكەنىن ايتىپ، سەس كورسەتكەن ەدى. ەندى، اقش-تىڭ وسى ۇسىنىسىنا قاراماستان، تۇركيا «ىشكى قاجەتتىلىكتەرگە سايكەس ارەكەت ەتەتىنىن»، ياعني يراننان مۇناي ساتىپ الۋدى توقتاتپايتىنىن حابارلادى.

“The Qazaq Times”