فوتو: worldbulletin.net

بۇگىن تەھراندا (يران، تەگەران) رەسەي، يران جانە تۇركيا پرەزيدەنتتەرىنىڭ ءسامميتى باستالدى. بۇل — سۇريالىق دەەسكالاتسيا ايماعىنداعى ءبىتىم رەجيمىن ساقتاۋعا مىندەتتەلگەن كەپىل-ەلدەردىڭ ءۇشىنشى كەزدەسۋى. بۇل تۋرالى worldbulletin.net حابارلايدى.

ءبىرىنشى كەلىسسوز 2017 جىلدىڭ قاراشا ايىندا رەسەيدىڭ سوچي قالاسىندا ءوتتى. ەكىنشى سامميت وسى جىلدىڭ ءساۋىر ايىندا انكارادا بولدى. كەلىسسوزدەر قورىتىندىسى بويىنشا، تاراپتار جۇمىستى جالعاستىراتىندارىن بىلدىرەتىن ورتاق مالىمدەمە قابىلدادى.

وتكەن جىلى ۆلاديمير پۋتين، رەجەپ تايىپ ەردوعان جانە حاسان رۋحاني ءسۇريا ۇلتتىق ديالوگىنىڭ كونگرەسىنىڭ وتكىزۋ باستاماسىنا ەرەكشە كوڭىل ءبولدى. ەسكە سالايىق،  سۇريا اراب رەسپۋبليكاسىنىڭ (سار) ءتۇرلى ەتنيكالىق  جانە ءدىني توپتارى وكىلدەرىنىڭ كونگرەسى ۇستىمىزدەگى جىلدىڭ قاڭتارىندا ءوتتى.

انكارادا وتكەن ەكىنشى سامميت قورىتىندىسى بويىنشا، سار-دىڭ مەملەكەتتىك قۇرىلىمى سۇريالىق قاقتىعىسقا قاتىسۋشى تاراپتاردىڭ وكىلدەرىنىڭ ارنايى كونستيتۋتسيالىق كوميتەتىن بەلگىلەۋ كەرەك ەدى، وسى ىسكە كۇش سالۋعا بۇۇ-نىڭ ءسۇريا ءىسى جونىندەگى ارنايى ەلشىسى ستەفان دە ميستۋرا ۋادە بەرگەن.

بۇگىن، 7-قىركۇيەك ءسامميتىنىڭ نەگىزگى تاقىرىپتارىنىڭ ءبىرى ءسۇريانىڭ يدليب قالاسى توڭىرەگىندەگى احۋال بولماق. اقپارات قۇرالدارىنىڭ جازۋىنشا، ليدەرلەر «ءسۇريا ماسەلەسىن رەتتەۋدىڭ بارلىق اسپەكتىلەرىن» تالقىلاۋعا نيەتتى.

وتكەن جىلى يران، رەسەي جانە تۇركيا سار تەرريتورياسىندا دەەسكالاتسيا ايماعىن قۇرۋعا كەلىسكەن ەدى. تاراپتار وسى ارقىلى ايماقتا قاقتىعىستى توقتاتۋ رەجيمىن ساقتاۋعا مىندەتتەلگەن بولاتىن. الايدا، بۇل ءبىتىم دايش، «دجابحات ءان-نۋسرا» سىندى تەررورلىق توپتارعا قاتىسى بولماعان. ال، دەەسكالاتسيالىق ايماقتاردىڭ ءبىرى سار-دىڭ باتىسىندا ورنالاسقان يدليب بولۋى كەرەك ەدى.

“The Qazaq Times”