رەسەي اقش سانكتسيالارىنان قورعايتىن جوسپار قۇرۋدا – دەپ حابارلايدى ربك تەلەارناسى.

ربك مالىمەتىنشە، رەسەي قاۋىپسىزدىك كەڭەسى قىركۇيەك ايىنىڭ 5-ءى كۇنى مينيسترلىكتەر مەن ۆەدومستۆا باسشىلارىن جيناپ، اقش سانكتسيالارىنان قورعانۋ جانە قارسى شارالار ۇيىمداستىرۋعا بايلانىستى جوسپار قۇرۋدى تاپسىرعان. قازىردىڭ وزىندە قارجى مينيسترلىگى، ەكونوميكانى دامىتۋ ءمينيسترى، ورتالىق بانك اتالمىش ماسەلەگە بايلانىستى ءوز جوسپارلارىن ۇسىنعان. ۇسىنىستار اراسىندا حالىقارالىق ساۋدا-ساتتىق كەلىسىمدەرىندە اقش قۇقىقتىق نورمالارىن پايدالانباۋ سياقتى باستامالار بار.

ەستەرىڭىزگە سالايىق، تامىز ايىنىڭ 27-ءى كۇنى اقش-تىڭ رەسەيگە سالعان كەزەكتى سانكتسياسى كۇشىنە ەنگەن. كەلەسى سانكتسيالار تىزبەگى قاراشا ايىندا كۇشىنە ەنۋى مۇمكىن. ول رەسەي تاۋارلارىنىڭ ەكسپورتى مەن يمپورتىنا، مەملەكەتتىك بانكتەرىنە، زاڭدى تۇلعالارعا بەرىلەتىن نەسيەلەرگە سالىنادى دەپ كۇتىلۋدە.

"The Qazaq Times"