رۋمىنيادا ءۇش كۇننەن بەرى قارسىلىق شاراسى باسىلماي جاتىر

رۋمىنيا قالالارىندا حالىقتىڭ قارسىلىق ناۋقانى ءالى باسىلار ەمەس. شەرۋشىلەردىڭ تالابى — ۇكىمەتتىڭ وتستاۆكاعا كەتۋى.  «yeniakit.com.tr» سايتىنىڭ حابارلاۋىنشا،  قارسىلىق اكتسيالارى ەل استاناسى بۋحارەستتەن باستاپ، سيبيۋ، كونستانتسە، كلۋج-ناپوكە جانە ياسسى قالالارىندا وتۋدە.

ءبىر عانا بۋحارەست قالاسىنىڭ وزىندەگى ۆيكتوريا الاڭىنا ون مىڭداعان ادام جينالعان. كەيبىر قالالاردا، اسىرەسە بۋحارەست پەن كلۋج-ناپوكەدە، قارسىلىق شاراسىنا شىعۋشىلار ءتۇنى بويى ۇيلەرىنە قايتپاعان.

سايتىمىزدا وسىعان دەيىن دە جازعانىمىزداي، 11 تامىز، سەنبى كۇنى رۋمىنيا استاناسى بۋحارەستە وتكەن قارسىلىق ناۋقانىندا 440-تان استام ادام زارداپ شەككەن ەدى. ال، بۇگىندە ولاردىڭ سانى 1000-عا تاياعان. شەرۋشىلەر، پارلامەنتتىڭ تاراتىلۋى، مەرزىمىنەن بۇرىنعى سايلاۋ، تەحنوكرات ۇكىمەتى، ادىلەتتىڭ ورناتىلۋى، سونىمەن قاتار، 100-ءى ءتۇرلى ۇلت وكىلدەرىنەن تۇراتىن 300 سەناتوردان قۇرالعان بىرپالاتالىق پارلامەنت قۇرۋ سياقتى تالاپتار قويۋدا.

نارازى بولعان رۋمىن حالقى، سالىق جۇيەسى مەن زەينەتاقى رەفورماسىنا، الەۋمەتتىك كومەك جۇيەسىنە رەفورما جاساۋدى دا سۇرايدى. ولار ەكونوميكا، اۋىلشارۋاشىلىعى مەن كاسىپكەرلىك سالالارىن دامىتپايىنشا،  ەۋروپا وداعى، ناتو سياقتى ءىرى وداقتارمەن سەرىكتەستىك قارىم-قاتىناستى جالعاستىرۋ مۇمكىن ەمەس دەگەن ۇستانىمدا.

“The Qazaq Times”