اراب ەلدەرى مەن اقش يرانعا قارسى «اراب ناتو-سىن» قۇرۋدا

اقش پەن اراب ەلدەرىنە تيەسىلى اقپارات قۇرالدارىنىڭ حابارلاۋىنشا، امەريكا پرەزيدەنتى دونالد ترامپ بيلىگى ورتا شىعىستا جاڭا ءبىر اسكەري وداق قۇرۋدا. ناقتىراق ايتساق، دونالد ترامپ بيلىگى ساۋد-ارابياسى، بىرىككەن اراب امىرلىكتەرى ء(باا), كۇۆەيت، كاتار، باحرەين، مىسىر جانە يوردانيا ەلدەرىنەن قۇرالعان جاڭا ءبىر اسكەري وداق قۇرۋ جۇمىستارىن جۇرگىزۋدە. «اراب ناتو-سى» دەپ اتالاتىن وداقتىڭ يرانعا قارسى باعىتتا جۇمىس ىستەيتىنى دە حابارلاندى. بۇل تۋرالى مالىمەتتى «lanouvellerepublique.fr» ءىرى اقپارات اگەنتتىگى دە راستاپ، رەسمي تۇردە ءبولىستى.

ساياساتكەرلەردىڭ پايىمداۋىنشا، بۇل جوبانىڭ ماقساتى يراننىڭ وسى ايماقتاعى اسكەري جانە ساياسي ىقپالىنا قارسى كۇرەسۋ. اعىلشىن حابار اگەنتتىگى «Reuters»-ءتىڭ حابارلاۋىنشا، يرانعا قارسى قۇرىلىپ، استىرتىن تۇردە جۇرگىزىلۋى جوسپارلانعان وسى ساياسي جانە قاۋىپسىزدىك وداق اق ءۇي مەن ورتا شىعىس ەلدەرى اراسىنداعى قانداي دا ءبىر اسكەري جانە ساياسي شەشىمدەرگە باعىتتالعان. اقش-قا قاراستى وداق پارسى شىعاناعى ەلدەرىمەن قاتار، مىسىر مەن يوردانيانى دا قامتىپ، وسى ەلدەر اراسىندا زىمىران قاۋىپسىزدىگى، اسكەري جاتتىعۋ، تەرروريزممەن كۇرەس سەكىلدى وتە اۋقىمدى جوبالارعا ارنالعان. اراب ەلدەرىنىڭ اراسىندا ايماقتىق ەكونوميكالىق جانە ديپلوماتيكالىق قارىم-قاتىناستاردىڭ دامىتىلۋى دا وداقتىڭ باستى كوزدەگەنى بولۋى مۇمكىن.

وسى حابارعا قاتىستى رەسمي مالىمدەمە جاساعان اق ءۇي: «سوڭعى بىرنەشە ايدان بەرى ايماقتىق سەرىكتەستەرىمىزبەن جوسپار قۇرۋدامىز. ءارى سول جوسپارىمىزدى جۇزەگە اسىرۋدامىز» ، - دەپ مالىمدەمە جاساسا، اق ءۇي ۇلتتىق قاۋىپسىزدىك كەڭەسىنىڭ ءباسپاسوز حاتشىسى: «اتالعان جوبامىزدىڭ ماقساتى — يراننىڭ اسكەري شابۋىل ارەكەتتەرىمەن، تەرروريزممەن جانە ەكسترەميزممەن كۇرەسىپ، ورتاشىعىستا تۇراقتىلىق ورناتپاق» - دەگەن.

يران دا تاراپى دا وسى ماسەلەگە بايلانىستى ءوز مالىمدەمەسىن جاساپ ۇلگەردى. «امەريكا مەن ايماقتىق وداقتاستارى ورتا شىعىستا تۇراقتىلىق ورناتامىز دەگەن جەلەۋمەن ايماقتاعى شيەلەنىستى ودان سايىن ۋشىقتىرۋدا» دەگەن. نەگىزى، بۇل جوسپارسىز-اق، وسى كۇنى يران مەن اقش ارا-قاتىناسىنىڭ  شيەلەنىستى جاعدايعا جەتكەنى انىق. ەندى، ساراپشىلاردىڭ پىكىرىنشە، اقش يرانعا شابۋىلىن اراب ەلدەرى ارقىلى  سىناماقشى.

“The Qazaq Times”