ءسۇريا اسكەرى دەرا قالاسىن الدى. جەتى جىل بۇرىن وسى جەردە اساد رەجيمىنە قارسى كوتەرىلىس باستالعان ەدى

سۇريالىق اقپارات قۇرالدارى اساد كۇشتەرىنىڭ رەسەيلىك اسكەريلەرى كومەگىمەن قالاعا كىرىپ، قالا ورتالىعىنداعى الاڭعا ەل بايراعىن تىكتى دەپ حابارلايدى.

وپپوزيتسيا كۇشتەرى قارۋلارىن تاستاپ، راقىمشىلىققا كەپىلدىك بەرىلگەن جاعدايدا ەلدىڭ سولتۇستىگىنە كەتۋگە كەلىسكەن. 19 ماۋسىمنان باستاپ ۇكىمەتتىك كۇشتەر دەرا قالاسىنىڭ ماڭايىنداعى اۋقىمدى تەرريتوريانى ءوزىنىڭ باقىلاۋىنا العان. بۇۇ-نىڭ مالىمەتىنە قاراعاندا، قاقتىعىستىڭ سالدارىنان 234 مىڭ ادام بوسقىنعا اينالىپ، ولاردىڭ 70%-ى يزرايل تاراپىنان باسىپ الىنعان گولان شىڭدارىمەن قاتار ورنالاسقان كۋنەيترا قالاسىنا باس ساۋعالاعان. ال، يوردانيا شەكاراسىنداعى ون مىڭداعان بوسقىن ماۋسىم ايىنىڭ باسىندا دەرا ماڭايىنداعى وپپوزيتسيا كۇشتەرى قارۋلارىن تاستاپ، شام (داماسك) باقىلاۋىنا وتۋگە كەلىسكەننەن كەيىن ءوز ۇيلەرىنە ورالعان.

بيلىكتىڭ شامعا ءوتۋى نەلىكتەن ماڭىزدى؟

اتالعان قالانىڭ ستراتەگيالىق ءارى سيمۆولدىق ماڭىزى وتە ۇلكەن. وسى ماڭىزدى قالا يوردانيامەن اراداعى باستى شەكارالىق نىسانعا تىكەلەي جاقىن ورنالاسقان. سونىمەن قاتار، ءدال وسى جەردە 2011 جىلى اساد رەجيمىنە قارسى كوتەرىلىس باستالعان ەدى.

سول كەزدەگى قارسىلىق شارالارى بيلىك مەكتەپ قابىرعالارىنا ۇكىمەتكە قارسى جازۋلار جازعان بىرنەشە جەتكىنشەكتى تۇتقىنداعاننان كەيىن باستالعان ەدى. بۇل سول كەزدەرى «اراب كوكتەمى» دەگەن اتاۋ العان كورشى ەلدەردەگى رەۆوليۋتسيامەن تۇسپا-تۇس بولدى. بيلىك قارسىلىق شاراسىنا شىعۋشىلارعا قارسى اتىس قارۋىن قولدانعاننان كەيىن بۇكىل ەل اۋماعىندا اسادتىڭ بيلىك باسىنان كەتۋىن تالاپ ەتكەن قارسىلىق شارالارى تۇتاندى. كوتەرىلىسكە شىعۋشىلاردىڭ سانى كۇن سايىن ارتىپ، ال بيلىكتىڭ ولارعا قارسى قولدانعان ايلا-تاسىلدەرى اسا قاتاڭ جاعدايعا جەتتى. وپپوزيتسيا كۇشتەرى قارۋعا جۇگىندى. باستاپقىدا بيلىك تاراپىنان جاۋدىرىلعان وقتان قورعانۋ ءۇشىن قارۋلانعانمەن، كەيىن قارۋ ولارعا ەل تەرريتورياسىن باقىلاۋعا الۋ ءۇشىن كەرەك بولدى. ناتيجەسىندە، كەيىن ازاماتتىق سوعىسقا ۇلاسقان وسى سويقاننىڭ سالدارىنان 350 مىڭنان استام ادام قازا تاۋىپ، 11 ملن ادام بوسقىنعا اينالدى.

قارۋلى وپپوزيتسيا نەلىكتەن دەرا قالاسىندا بەرىلدى؟

ءسۇريانىڭ وڭتۇستىك-باتىسى سوڭعى جىلدا ەداۋىر سايابىرسىپ، وسىنىڭ ناتيجەسىندە قاۋىپسىز ايماق تۋرالى كەلىسىمشارت جاسالدى. بۇعان وپپوزيتسياعا قولداۋ كورسەتۋشى اقش پەن يوردانيا جانە اساد رەجيمىنىڭ وداقتاسى رەسەي قاتىستى. الايدا، 2018 جىلدىڭ كوكتەمىندە شام توڭىرەگىندە ورنالاسقان شىعىس گۋتاداعى وپپوزيتسيانى جەڭگەنمەن، اساد ەلدىڭ قالعان تەرريتورياسىنىڭ ءبارىن تىكەلەي ءوز باقىلاۋىنا الۋدى شەشتى. رەسەيلىك اۆياتسيا تاراپىنان قولداۋ تابۋشى ۇكىمەتتىك كۇشتەر مەن وداقتاس ەلدەردىڭ اسكەريلەرى ءۇش اپتا بۇرىن شابۋىلدار باستاپ، وپپوزيتسيا تەرريتورياسىنا تەز ارادا ىشكەرىلەي بەردى.  زىمىران سوققىلارى مەن زەڭبىرەكتەر قارۋلى وپپوزيتسيا كۇشتەرىن السىرەتتى. بۇل جولى اقش ولارعا اسكەري تۇردە قولداۋ كورسەتپەدى. ەندى، يوردانيا مەن يزرايل بيلىكتەرى مىڭداعان بوسقىندارعا شەكارالارىن اشقان كەزدە، بۇۇ گۋمانيتارلىق داعدارىس قاۋپى تۋرالى ەسكەرتۋ جاساۋدا. ۇيىم لاگەرلەردەگى ءومىردىڭ وتە ناشار ەكەنىن، كوپتەگەن ادامداردىڭ اس-سۋسىز، اشىق اسپان استىندا لاجسىز كۇن كورىپ جاتقاندارىن جاريالاپ وتىر.

 “The Qazaq Times”