گۇلنارا كارىموۆانىڭ ادۆوكاتى شاۆكات ميرزيەەۆپەن كەزدەسپەك

گۇلنارا كارىموۆانىڭ ادۆوكاتى وزبەكستان پرەزيدەنتى شاۆكات ميرزيەەۆپەن كەزدەسپەك – دەپ حابارلايدى «centralasian.org» اقپارات اگەنتتىگى.

اگەنتتىك مالىمەتىنشە، ەكس-پرەزيدەنت يسلام كارىموۆتىڭ قىزى گۇلنارا كارىموۆانىڭ شۆەيتساريالىق ادۆوكاتى گرەگۋار مانجا تاشكەنت قالاسىنا ۇشىپ كەلگەن. الدىن الا بولجام بويىنشا، مانجا بۇل جولعى ساپارىنادا 2015 جىلدان بەرى قاماۋدا وتىرعان گۇلنارا كارىموۆامەن كەزدەسىپ، ونىڭ جاعدايىن بىلمەك. بۇدان بولەك شۆەيتساريالىق زاڭگەر وزبەكستان باس پروكۋراتۋراسىنان ەل پرەزيدەنتى شاۆكات ميرزيەەۆپەن كەزدەسۋ ۇيىمداستىرۋدى سۇراماق.

گرەگۋار مانجانىڭ سوزىنشە، قازىرگى تاڭدا گۇلنارا كارىموۆا تاشكەنتتەن ءۇش ساعاتتىق جەردە ورنالاسقان تۇرمەدە قاماۋدا وتىر. ونىڭ جاعدايى بيلىك باسىنا شاۆكات ميرزيەەۆتىڭ كەلۋىمەن ءسال دە بولسا جاقسارعان. بىراق كارىموۆانىڭ ءىسى مەن جاعدايى ميرزيەەۆكە تىكەلەي بايلانىستى. سەبەبى وعان قاتىستى قىلمىستىق ىستە ءالى اشىلماعان بەلگىسىز دۇنيەلەر وتە كوپ.

ەستەرىڭىزگە سالايىق، گۇلنارا كارىموۆانى 2015 جىلى تاشكەنت قالالىق سوتى 5 جىلعا باس بوستاندىعىنان ايىرعان. وعان «مەملەكەت مۇلكىن تالان-تاراجعا سالدى»، «قىزمەتىن اسىرا پايدالاندى»، «اسا ءىرى كولەمدە پارا الدى جانە قارجى بوپسالادى» - دەگەن ايىپتار تاعىلعان. كەيىننەن 2017 جىلدىڭ ماۋسىم ايىندا وزبەكستان باس پروكۋراتۋراسى گۇلنارا كارىموۆا ىسىنە قاتىستى تىڭ دەرەكتەردى كوپشىلىك نازارىنا ۇسىنعان. وندا ەكس-پرەزيدەنت قىزىنىڭ ۇستىنەن جاڭا قىلمىستىق ءىس قوزعالعاندىعى جونىندە ايتىلعان.

“The Qazaq Times”