تاعى ءبىر ەل بوسقىندار ماسەلەسىنە قاتىستى نارازىلىق ءبىلدىردى

«يتاليا بۇدان بىلاي ميگرانتتار ماسەلەسىن شەشپەيدى». وسىلاي دەگەن يتاليانىڭ جاڭادان سايلانعان ىشكى ىستەر ءمينيسترى ءارى ۆيتسە-پرەمەرى ماتتەو سالۆيني ميگرانتتار ماسەلەسىندە ەۋروداقتىڭ تەك ءسوز جۇزىندە عانا كومەكتەسەتىنىن ايتتى.

ەۋروداق ميگرانتتار ماسەلەسىن رەتتەۋدە يتالياعا كومەك كورسەتۋى ءتيىس، ايتپەگەن جاعدايدا يتاليا بۇل ماسەلەنى شەشۋدىڭ باسقا جولدارىن ىزدەيدى دەگەن ول، بۇگىن — 4 ماۋسىمداعى رەسمي مالىمدەمەسىندە. بۇل تۋرالى abhaber.com اگەنتتىگى حابارلايدى.

ناقتى قانداي «جولدار» ەكەنىن ايتپاعانمەن، ۆيتسە-مينيستر نەدە بولسا قۇقىقتىق جانە ەكونوميكالىق ادىستەرگە سۇيەنەتىنىن ەسكەرتتى. ول، سونىمەن قاتار، «يتاليا بوسقىنداردىڭ لاگەرىنە اينالدىرىلمايدى، وعان جول بەرمەيمىز»، - دەدى. ونىڭ سوزىنشە، ءجۇز مىڭ ميگرانتتىڭ ءبارى بىردەي بوسقىن بولىپ تابىلمايدى. سول سەبەپتەن، يتاليا وسىنشاما ميگرانتتارعا (بوسقىن بولىپ سانالمايتىن) كەتەتىن شىعىنعا جول بەرمەيدى. ءارى، ميگرانتتاردىڭ يتاليادا بولۋ مەرزىمىنە قاتىستى ماسەلەنى دە قايتا قاراۋعا الۋ كەرەك. سەبەبى، اقىلى ەكى جارىم جىل — وتە ۇزاق ءارى شىعىندى ۋاقىت بولىپ سانالادى. ءسالۆينيدىڭ ايتۋىنشا، ەو بيلىگى ميگرانتتار ماسەلەسىنە تەك ءسوز جۇزىندە عانا قولداۋ كورسەتەدى. ال ولاردى ءىس جۇزىندە رەتتەۋگە كەلگەندە — ءبارى كەرىسىنشە. جەرورتا تەڭىزى ەلدەرىنە قارجى وتە از جىبەرىلەدى. ال، ەۋروپانىڭ سولتۇستىك جانە شىعىس ەلدەرىنە قارجىلاي كومەك كوبىرەك كورسەتىلەدى. «ءبىر تاڭقالارلىعى — ءبىز كورشىلەرىمىزگە قاراعاندا، كوپ اقشا تولەيمىز. ال، الۋ جاعىنا كەلگەندە وتە از الامىز» ، - دەدى سالۆيني. بۇرىننان وزەكتى سانالعان بوسقىندار ماسەلەسى، سوڭعى ۋاقىتتارى باتىس ەلدەرىنىڭ اراسىندا، اسىرەسە ەۋروداققا مۇشە ەلدەر اراسىندا كەلىسپەۋشىلىك تۋدىرىپ جۇرگەنى راس. بۇدان بۇرىن حابارلاعانىمىزداي، فرانتسيا بيلىگى دە ەل استاناسىنىڭ ماڭىنداعى بوسقىندار لاگەرىن جاپپاي جويۋعا شەشىم قابىلداپ، ول ويلارىن ىسكە اسىرعان ەدى. ەندى، بوسقىندارعا "جومارتتىق" تانىتىپ كەلگەن يتاليا دا بۇل ماسەلەدە ساناسا باستاعانداي.

 “The Qazaq Times”