بۇۇ بوسقىندار ءۇشىن تەز ارادا كومەك سۇراپ، دابىل قاقتى

بىرىككەن ۇلتتار ۇيىمى (بۇۇ) سۇريالىق بوسقىندار ءۇشىن مىندەتتەلگەن جاردەم اقشالاردىڭ تەك 20 %-نىڭ عانا جينالعانىنا نازار اۋدارتىپ، «شۇعىل» تۇردە كومەك كەرەك ەكەنىن حابارلادى. بۇل تۋرالى «yeniakit.com.tr» اگەنتتىگى حابارلايدى.

سۇريالىق بوسقىندار ءۇشىن قۇرىلعان بيۋدجەتتەگى اقشانىڭ ازايعانىن ايتىپ دابىل قاققان بۇۇ، «دونور» ەلدەردى تەز ارادا كومەك كورسەتۋگە شاقىردى. ۇيىمنىڭ حابارلاۋىشا، جينالادى دەپ ەسەپتەلگەن 4 ميلليارد 400 مىڭ دوللاردىڭ تەك 20 %-ى جينالعان.

وسى بەيسەنبى كۇنى يوردانيادا جاسالعان مالىمدەمەدە سۇريالىق بوسقىنداردىڭ ازىق-تۇلىك، ءبىلىم، دەنساۋلىق جانە قولما-قول اقشا سياقتى قاجەتتىلىكتەرى وتەلىپ وتىرعان كومەك باعدارلامادارىندا قارجىلىق قيىندىق پايدا بولعانى ءبىلدىرىلدى. مالىمدەمەدە ايماقتىق تۇتاستىق پەن بوسقىندار جوسپارى اياسىندا 2018 جىل ءۇشىن 5 ميلليارد 600 ميلليون دوللار قاجەت بولعانىن ەسكەرتىلدى. جوسپار اياسىندا كورشى ەلدەر يوردانيا، ليۆان، يراك، تۇركيا جانە مىسىرداعى سۇريالىقتار نەگىزگى قاجەتتىلىكتەرمەن قامتاماسىز ەتىلەدى دەپ كۇتىلگەن.

بۇۇ بوسقىندار ءىسى جونىندەى جوعارى كوميسسارياتىنىڭ ورتا شىعىس پەن سولتۇستىك افريكا باعىتىنداعى ديرەكتورى امين اۆاد، جينالعان 20 % كولەمىندەگى قارجىنىڭ جەتكىلىكسىز ەكەنىن،  ازاماتتىق سوعىستىڭ اياقتالۋىنا قاتىستى قانداي دا ءبىر ساياسي شەشىم تابۋدىڭ وزىنە قارجى كەرەك ەكەنىن تىلگە تيەك ەتتى.

بۇۇ-نىڭ مالىمەتتەرىنە قاراعاندا، سۇرياداعى ازاماتتىق سوعىس باستالعان 2011 جىلدان بۇگىنگە دەيىن شامامەن 5 ميلليون 600 مىڭ ادام كورشى ەلدەرگە باس ساۋعالاعان. ال، 6 ميلليونعا جۋىق سۇريالىق ەل ىشىندە قاشىپ كۇنەلتۋدە ەكەن.

“The Qazaq Times”