بىشكەك قالالىق سوتى قازاقستاندىق بەلسەندى مۇراتبەك تۇڭعىشباەۆتى قاماۋعا الۋ تۋرالى اۋداندىق سوتتىڭ شەشىمىن وزگەرىسسىز قالدىردى. بۇل تۋرالى ايىپتالۋشىنىڭ قورعاۋشىسى نۇربەك توقتاقۋنوۆ مالىمدەدى. ادۆوكاتتىڭ ايتۋىنشا، قازاق ۇلتشىلى ەكى ايعا تۇرمەگە توعىتىلعان.

زاڭگەر بىشكەك سوتى قورعاۋ تارابى كەلتىرگەن دايەكتەردىڭ ەشبىرىن ەسكەرمەي، بىرجاقتى شەشىم شىعارا سالدى دەپ قىنجىلادى.

 - سوت كەلتىرگەن دايەكتەرىمىزدىڭ ەشقايسىسىن ەسكەرگەن جوق. قازاقستان رەسپۋبليكاسىنىڭ قىلمىستىق كودەكسىندەگى 266-باپتىڭ قىرعىزستان زاڭىندا بالاماسى جوق. كيشينەۆ كونۆەنتسياسى، وزگە دە حالىقارالىق كەلىسىمدەرگە سايكەس، مۇنداي كەزدە ازاماتتاردى وزگە ەلگە بەرمەيدى. ال ەگەر بەرىلمەسە، وندا قاماۋعا دا الۋعا بولمايدى. وسى سياقتى دالەلدەردىڭ ەشقايسىسى سوتتا ەسكەرىلمەدى. سوت تەك بۇلاردى اينالىپ ءوتتى، - دەيدى نۇربەك توقتاقۋنوۆ.

24 مامىردا قىرعىزستان باس پروكۋراتۋراسى قازاقستاندىق بەلسەندى مۇراتبەك تۇڭعىشباەۆتى قازاقستان بيلىگىنە تاپسىرۋ تۋرالى شەشىم شىعارعان.

باس پروكۋراتۋرا قاۋلىسىندا قازاقستاندا بەلسەندىنىڭ ۇستىنەن "قىلمىستىق توپتىڭ قىزمەتىن قارجىلاندىرۋ" جانە "ەكسترەميستىك ۇيىم قۇرۋ جانە ونىڭ قىزمەتىنە قاتىسۋ" بويىنشا ايىپتار تاعىلىپ وتىرعانى جازىلعان. قاۋلىدا سونىمەن بىرگە، ونىڭ ۇستالۋىندا "ساياسي استارى جوق" ەكەنى جانە ونىڭ ازاپتاۋعا ۇشىرامايتىنى تۋرالى دا ايتىلعان.

ادۆوكات نۇربەك توقتاقۋنوۆ قىرعىزستان باس پروكۋراتۋراسىنىڭ بۇل شەشىمىنە بايلانىستى اپپەلياتسيالىق شاعىمدى وسى اپتادا سوتقا تۇسىرەتىنىن ايتتى.

قازاقستاندىق بەلسەندى مۇراتبەك تۇڭعىشباەۆتى قىرعىزستاننىڭ ارنايى قىزمەت وكىلدەرى مامىردىڭ 10-ى كۇنى بىشكەكتە تۇرىپ جاتقان جەرىندە ۇستاعان. كەلەسى كۇنى بىشكەكتىڭ پەرۆوماي اۋداندىق سوتى ونى ەكى ايعا قاماۋ تۋرالى شەشىم شىعارعان.

“The Qazaq Times”