يزرايل اسكەرى سوعىس جاعدايىنا ءوتتى – دەپ حابارلايدى نەمىس تولقىنى اقپارات اگەنتتىگى.

مامىر ايىنىڭ 8-ءى كۇنى يزرايل ارمياسىنىڭ رەسمي وكىلى دجوناتان كونريكۋس ءوزىنىڭ Twitter پاراقشاسىنا: «يزرايل ارمياسى ءسۇريا اۋماعىنداعى يران اسكەرىنىڭ بەلسەندى ارەكەتتەرىنە بايلانىستى جەرگىلىكتى بيلىك وكىلدەرىنە «گولاند بيىكتىگىندەگى» بەيبىت تۇرعانداردىڭ قاۋىپسىزدىگىن قامتاماسىز ەتۋ ماقساتىندا بۋنكەرلەردى دايىنداۋعا تاپسىرما بەردى. يزرايل ارمياسى سىرتتان كەلەتىن كەز كەلگەن ارانداتۋ ارەكەتىنە قاتاڭ جاۋاپ بەرەدى» - دەپ جازعان.

بۇدان بولەك يزرايل قورعانىس ءمينيسترى اۆيگدور ليبەرمان جوعارى لاۋىزىمدى اسكەريلەردى تەل-اۆيۆ قالاسىنا شاقىرتقان. وندا ولار ءسۇريا اۋماعىنداعى يران ارمياسىنىڭ ءىس-ارەكەتىنە بايلانىستى جيىن وتكىزگەن. جيىننان كەيىن يزرايل قارۋلى كۇشتەرى داماسك قالاسى ماڭىندا ورنالاسقان يران ارمياسىنا تيەسىلى اسكەري بازالاردى بومبالاعان. الدىنا الا بولجامدار بويىنشا اۋە شابۋىلى سالدارىنان 9 ادام كوز جۇمعان.

“The Qazaq Times”