پۋتين دۇنيەجۇزى كارتاسىن قۇراستىرۋعا تاپسىرما بەردى

رەسەي پرەزيدەنتى ۆلاديمير پۋتين «تاريحي جانە گەوگرافيالىق اقيقاتتاردى» ەشقانداي بۇرمالاۋسىز كورسەتەتىن دۇنيەجۇزى اتلاسىن قۇراستىرۋعا تاپسىرما بەردى، دەپ حابارلايدى كرەملدىڭ ءباسپاسوز قىزمەتى.

«تاپونيميكا سالاسىنا، ياعني گەوگرافيالىق جانە وزگە دە جەرلەردىڭ اتاۋلارىنا ەرەكشە كوڭىل ءبولىنۋ كەرەك. سوناۋ وتكەن عاسىرلاردا زەرتتەۋشىلەرىمىز بەن ساياحاتشىلارىمىزدىڭ  بەرگەن گەوگرافيالىق اتاۋلارى بۇگىندە دۇنيەجۇزى كارتاسىنان جويىلىپ بارادى. ولاردىڭ ورنىنا شەت مەملەكەتتەردىڭ  ءوز ويلارىنشا بۇرمالاپ قوسقان اتاۋلارى قولدانىلىپ ءجۇر»، - دەپ، ورىس گەوگرافيالىق قوعامىنىڭ (رگو) قامقورشىلىق كەڭەسىنىڭ وتىرىسىندا مالىمدەمە جاساعان.  رەسەي پرەزيدەنتىنىڭ سوزىنشە، وسىنداي جولدار ارقىلى «رەسەيدىڭ جەر شارىنىڭ زەرتتەلۋى مەن عىلىمعا قوسقان ۇلەسى ەلەنبەي، اياق استى ەتىلۋدە».  بۇعان مىسال رەتىندە انتاركتيدانى اتاعان پۋتين: «كونتينەنتتى العاش اشقان لازارەۆ پەن بەللينسگاۋزەن بەرگەن اتاۋلار قولدانىستان شىعىپ قالدى دەسەك تە بولادى. ءبىز ەشكىمدى ەش نارسەگە ماجبۇرلەۋدەن اۋلاقپىز. الايدا، ادىلەتتىلىك پەن تاريحي جانە گەوگرافيالىق اقيقاتتاردىڭ بۇرمالانۋىنا جول بەرۋگە دە قۇقىعىمىز جوق» ، - دەدى.

ول ورىس تىلىندە دۇنيەجۇزى اتلاسى قۇراستىرىلاتىنىن جانە نەگىزگى اتاۋى ورىسشا بولسا دا، كەيىننەن وزگە تىلدەردە جاڭاشا اتالعان جەرلەرگە قاتىستى تۇزەتۋلەر ەنگىزەتىنىن ايتىپ، قاتاڭ تاپسىرما بەرگەن. شەتەلدىك باقىلاۋشىلار، ءپۋتيننىڭ بۇل مالىمدەمەسىن ماسكەۋدىڭ سولتۇستىك پوليۋستەن كەيىن وڭتۇستىك پوليۋستە دە باتىسپەن قاقپايلاسۋعا ىڭعاي تانىتىپ وتىرۋى مۇمكىن دەگەن پىكىردە.

“The Qazaq Times”