بەلارۋس پرەزيدەنتى الەكساندر لۋكاشەنكو

بەلارۋس رەسپۋبليكاسى ەشقاشان باسقا مەملەكەتتىڭ، ءتىپتى رەسەيدىڭ قۇرامىنا كىرمەيدى. بۇل تۋرالى الەكساندر لۋكاشەنكو پارلامەنت وكىلدەرىمەن كەزدەسۋدە مالىمدەدى.

بەلتا اگەنتتىگى جاريالاعان مالىمدەمەدە لۋكاشەنكو: «ەڭ باستىسى، رەسەي فەدەراتسياسى-ءبىزدىڭ ستراتەگيالىق ارىپتەسىمىز. بۇل ەكونوميكالىق، ساياسي جانە اسكەري سالالارداعى سەرىكتەس دەگەندى بىلدىرەدى. ال مەملەكەتىمىز رەسەي قۇرامىنا كىرمەيدى»، – دەدى.

سونىمەن قاتار، بەلارۋس ءوز مۇمكىندىكتەرى مەن رەسۋرستارىنا عانا سۇيەنىپ، رەسەيدەن قارجىلاي قولداۋدى سۇرامايتىنىن اتاپ وتكەن لۋكاشەنكو: «ەۋرازيالىق بانكتىڭ (ەۋرازيالىق تۇراقتاندىرۋ جانە دامۋ قورى) باسشىسىنا ەسكەرتتىم. قارجى مينيسترىنە بۇل اقشانى الۋعا تىيىم سالدىم. ءبىز ءوز كۇشىمىزگە سەنەمىز، ماسەلەلەردى قارىزسىز شەشەمىز»، – دەدى.

ەكى ەل اراسىندا مۇناي تاسىمالداۋ جونىندە ماسەلەلەر ءالى شەشىمىن تاپقان جوق. وسىعان دەيىن لۋكاشەنكو رەسەي مۇنايىنىڭ ساپاسىز ەكەنىن ايتىپ، وتەماقى تالاپ ەتكەن. ول سوزىندە: «رەسەيلىك مۇناي قۇبىر جەلىسىنەن وتە كوپ كولەمدە شىعىن كەلدى. مۇناي قۇبىرىنداعى جابدىقتاردىڭ وزىنە جانە مۇناي وڭدەۋ زاۋىتىنا كەلگەن شىعىن وراسان. ءبىز كىرىستىڭ بەلگىلى ءبىر بولىگىن الا المادىق، ۆاليۋتالىق ءتۇسىم، كوپ اقشادان ايرىلدىق. ءبىزدىڭ ەلگە كەلگەن زالال كولەمى جۇزدەگەن ميلليون دوللار. ۇلكەن سوما. ماسكەۋدەن وتەماقى تالاپ ەتەمىز جانە رەسەي بۇل شەشمىمەن داۋلاسپايدى دەگەن سەنىمدەمىن»، – دەدى.

ايتا كەتەيىك، بەلارۋس رەسەيدەن مۇناي ونىمدەرىن ساتىپ الىپ، ەكسپورتتاپ كەلگەن. بيىل رەسەي وزىنە قاۋىپ بولعان ەكونوميكالىق داعدارىستى ەڭسەرۋ ءۇشىن، مۇناي باعاسىن ءوسىرۋ تۋرالى شەشىم شىعاردى. ياعني ماسكەۋ تاراپى 2024 جىلى بەلارۋس يمپورتتايتىن مۇنايعا باج سالىعىن سالاتىنىن ايتتى. وسى مالىمدەمەدەن كەيىن مينسك پەن ماسكەۋ قاتىناسىنا سىزات تۇسە باستادى.

"The Qazaq Times"