كەشە بۇۇ قاۋىپسىزدىك كەڭەسى ءسۇريانىڭ دۋما قالاسىندا بولعان حيميالىق جارىلىسقا بايلانىستى نيۋ-يوركتە باس قوسقان ەدى. جينالىستا اقش پەن رەسەي اراسىندا قاتاڭ ايتىس-تارتىس ورىن الىپ، اقش وكىلى گالەي جيىن سوڭىندا قانداي شەشىم شىعارىلسا دا، وزدەرىنىڭ وسىنداي شابۋىل ارەكەتتەرىنە قارسى ەكەندىكتەرىن ءبىلدىردى.

رەسەي بولسا، قانداي دا ءبىر ىسكە نەگىزسىز ارالاسۋعا بولمايتىنىن، ونىڭ وسى تەكتەس حالىقارالىق قاقتىعىستاردى ازايتۋ جولىندا ءتيىمسىز ەكەنىن ايتتى. ال، ءسۇريانىڭ ارنايى وكىلى سىني ەسكەرتۋ جاساپ، «شىعىس گۋتاداعى جاعدايدان كەيىن، العاش رەت ايماقتىق، ۇلتتىق نەمەسە تەك قانا ءسۇريانىڭ قاۋىپسىزدىگى ەمەس، حالىقارالىق قاۋىپسىزدىككە كەرى اسەر ەتەتىندەي جاعدايعا جەتتىك» ، - دەدى. نەگە ەكەنى، ءسۇريا ەلشىسى ءسوز العان ساتتە اقش، ۇلىبريتانيا جانە فرانتسيا وكىلدەرى وتىرىستىڭ ءبىتۋىن كۇتپەستەن، جينالىس زالىن تاستاپ، شىعىپ كەتتى. ەستەرىڭىزگە سالساق، كەشە بۇۇ قاۋىپسىزدىك كەڭەسى شىعىس گۋتانىڭ دۋماداعى حيميالىق قارۋ شابۋىلىنا قاتىستى فرانتسيا، ۇلىبريتانيا، اقش جانە كەڭەستىڭ ۋاقىتشا مۇشەلەرى كوت-د'يۆۋار، گوللانديا، پەرۋ، پولشا، كۋۆەيت جانە شۆەتسيانىڭ تالابىمەن وتىرىس جاساعان بولاتىن.  الايدا، جيىن سوڭى سۇرياداعى كوپتەگەن بەيبىت تۇرعىنداردىڭ ءومىرىن جالماعان قاقتىعىستارعا توقتام جاسايتىنداي، ناقتى شەشىممەن اياقتالمادى.

“The Qazaq Times”