فوتو: worldbulletin.net

ەۋروپا وداعى رەسەي تاراپىنان الداعى ۋاقىتتا تاعى دا ورىن الۋى مۇمكىن كەلەڭسىزدىكتەرگە ساقاداي-ساي بولۋدىڭ قامىنا كىرىسكەن سىڭايلى. وتكەن جىلدىڭ قىركۇيەك ايىندا رەسەي ءوزى ۇيىمداستىرعان اسكەري جاتتىعۋ كەزىندە مىڭداعان اسكەرى مەن اسكەري جابدىقتارىن ەۋروپا شەكاراسىنا كىرگىزگەن. "ەvrensel.net" اقپارات اگەنتتىگى "ەۋروپا وداعى الداعى ۋاقىتتا دا وسى تەكتەس كەلەڭسىزدىكتەر ورىن الماس ءۇشىن ەو-عا مۇشە ەلدەر اراسىندا "اسكەري شەنگەن" جوباسىن قۇرۋدا" ، - دەپ حابارلايدى.

قاۋىپسىزدىك سالاسىنا بۇرىنعىدان دا باسىمدىق بەرىپ، ونىڭ قۇرىلىمىن وزگەرتۋدى ماقسات ەتكەن ەو، رەسەيدىڭ سوڭعى جىلدارى ءتۇرلى قاۋىپتى "ويىندارعا" تۇرتكى بولۋىنا بايلانىستى،"اسكەري شەنگەن ايماعىن" قۇراتىنىن جاريالادى. ەو كوميسسياسى اسكەري قۇرال-جابدىق پەن اسكەري بىرلىكتەردىڭ ەۋرووداققا مۇشە ءبىر ەلدەن ەكىنشى ەلگە وتەردە كەدەرگىگە ۇشىراۋىنا، اسكەري موبيلدىلىكتى جەڭىلدەتەتىن ينفراقۇرىلىمنىڭ جوقتىعىنا بايلانىستى وسىنداي شەشىمگە بەكىنگەن. جوعارىدا اتالعان اقپارات اگەنتتىگىنىڭ حابارلاۋىنشا، ەو سىرتقى ىستەر جانە قاۋىپسىزدىك ساياساتى جوعارى وكىلى ءارى ەۋروپالىق كوميسسيانىڭ ۆيتسە-پرەزيدەنتى فەدەريكا موگەريني وداق ىشىندەگى اسكەري موبيلدىلىك جەڭىلدەتىلگەن جاعدايدا اسكەري شيەلەنىستەردى بۇرىنعىدان الدەقايدا ءتيىمدى ءارى جىلدامىراق شەشۋگە بولاتىنىن ايتقان. اتالعان جوبانىڭ باستى ماقساتى رەتىندە اسكەري قۇرال-جابدىقتاردىڭ ءبىر ايماقتان توتەنشە وقيعا ورىن العان ەكىنشى ايماققا وتە جىلدام تۇردە جەتكىزۋىنە مۇمكىندىك جاساۋ، تانك جانە سوعان ۇقساس اسكەري كولىكتەرىنىڭ كەدەرگىلەرگە ۇشىراماستان، دىتتەگەن جەرىنە جەتۋىنە مۇمكىندىك بەرەتىن كوپىر، جول جانە تۋنەلدەردى قامتيتىن ينفراقۇرىلىم جاساۋ قاراستىرىلعان.

ماماندار "اسكەري شەنگەن" باستاماسىنىڭ جۇزەگە اسىرىلۋى ءۇشىن ناتو مەن ەو اراسىندا ناقتى ىنتىماقتاستىق كەرەك. وتكەن جىلى اقش كۇشتەرىنىڭ رۋمىنيا مەن بولگاريانىڭ (ەكەۋى دە ناتو مۇشەسى) شەكاراسىندا تولقۇجات پەن قارۋ-جاراق تەكسەرىسى ءۇشىن ەكى ساعات كۇتۋگە ءماجبۇر بولعانى "اسكەري شەنگەن" جوباسىنا دەگەن قاجەتتىلىكتى كورسەتەدى" ، - دەپ وتىر. ساياساتكەرلەر دە، قاۋىپ پەن قاتەرگە قارسى شارا قولدانۋ ءۇشىن ناتو كۇشتەرىنىڭ ەڭ از دەگەندە رەسەي بىرلىكتەرى سياقتى، ءتىپتى ولاردان دا جىلدام ارەكەت ەتۋى كەرەكتىگىن شەگەلەپ ايتۋدا. قىسقاسى، جوبا جۇزەگە اسىرىلعاننان كەيىن اسكەري بىرلىكتەر مەن قۇرال-جابدىقتار ەو-عا مۇشە ءبىر ەلدەن ەكىنشىسىنە نەمەسە شەكارالىق ايماقتارعا قازىرگىدەن اسا جىلدام جەتكىزىلمەك.

بايقاپ وتىرساق، "اسكەري شەنگەن" قىرعيقاباق سوعىسىنان (سۋىق سوعىس) كەيىن اسكەري ىنتىماقتاستىق سالاسىندا بارعان سايىن بەدەلى تۇسكەن ءارى قىرىمدى باسىپ العالى بەرى رەسەي تاراپىنان تۋىنداۋى مۇمكىن كەلەڭسىزدىكتەرگە الاڭداۋلى ناتو-نىڭ تالابىمەن جوسپارلانعان. ناتو-نىڭ بۇلاي الاڭداۋىنا قۇرامىنداعى كوپ ەلدىڭ رەسەيدىڭ اسكەري بىرلىكتەرى سياقتى وتە وپەراتيۆتى بارلاۋ جاساپ، جىلدام قيمىل كورسەتۋ قابىلەتىنە يە ەمەستىگى نەگىز بولعان سياقتى.

 

“The Qazaq Times”