يزرايلگە سوڭعى رەت ەسكەرتۋ جاسالدى: "ەندى ايتقاندى ورىنداماساڭدار، ايامايمىز!"

"يسلام قارسىلىق قوزعالىسى رەتىندە تانىمال حاماستىڭ قارۋلى قاناتى يززەددين ءال-كاسسام بريگاداسى، پالەستيناعا قارسى شابۋىل جاساماۋدى ايتىپ، يزرايلگە ەسكەرتۋ جاسادى" ، - دەپ حابارلايدى worldbulletin.net حالىقارالىق اقپارات اگەنتتىگى. كاسسام بەلسەندىلەرى ەگەر يزرايل وسى جولعى ەسكەرتۋلەرىنە قۇلاق اسپاسا وزدەرىنىڭ ەشتەڭەدەن تايىنبايتىندىقتارىن، جاۋلارىنا قارسى ۇلكەن كۇرەسكە دايىن ەكەندىكتەرىن ايتتى.

يززەددين ءال-كاسسام بريگاداسىنىڭ وكىلى ءابۋ ۋبەيدا كەشە، ياعني 26 ناۋرىزدا وتكەن اسكەري جاتتىعۋدان كەيىن جاساعان مالىمدەمەسىندە: "حالقىمىزدى، ەلىمىزدى، جەرىمىزدى قورعاپ، ولارعا قارسى جاسالاتىن قانداي دا ءبىر شابۋىلدىڭ بەتىن قايتارۋ ءۇشىن بارىنە دە دايىنبىز. ءبىز حالقىمىزعا قاتىستى كەز كەلگەن ىسكە سالعىرت قاراي المايمىز", - دەدى.

يززەددين ءال-كاسسام بريگاداسى تاراپىنان وتكىزىلگەن اسكەري جاتتىعۋدىڭ اياقتالعانىن ايتقان ءابۋ ۋبەيدا، وسى جاتتىعۋدى وزدەرىنىڭ سيونيست شابۋىلدارعا قارسى قانشالىقتى دەڭگەيدە دايىن ەكەندىكتەرىن جۇرتقا كورسەتۋ ءۇشىن ۇيىمداستىرعاندارىن جاسىرمادى. ول پالەستينا شەكاراسىنا تەڭىز جانە اۋە جولدارى ارقىلى شابۋىل جاساۋشى كۇشتەردى ىدىراتۋدىڭ وزدەرى ءۇشىن تۇك ەمەس ەكەنىن ايتقانىمەن قويماي، سوزىنە: "كاسسام اسكەرلەرىنىڭ قابىلەتى جوعارى دەڭگەيدە ءارى مىقتى جاتتىقتىرىلعان. جەر جۇزىندە پالەستينا حالقىنىڭ قۇقىعىنا قول سۇعۋعا باتىلى باراتىن نەمەسە ولار قالامايتىن قانداي دا ءبىر جوسپاردى جۇزەگە اسىرا الاتىن كۇش جوق" ، - دەگەندى دە قوسىپ قويدى.

“The Qazaq Times”