بەردىمۇحامەدوۆ پەن رۋحاني گاز داۋىن شەشپەك

بۇگىن اشحاباد قالاسىندا قۇربانعۇلى بەردىمۇحامەدوۆ پەن يران باسشىسى حاسان رۋحاني كەزدەسەدى – دەپ حابارلايدى  تۇركىمەنستان پرەزيدەنتىنىڭ ءباسپاسوز قىزمەتى.

يران پرەزيدەنتى حاسان رۋحاني بۇگىن اشحاباد قالاسىنا رەسمي ءىس-ساپارمەن كەلگەن. ول ءىس-ساپار بارىسىندا تۇركىمەنستان باسشىسى قۇربانعۇلى بەردىمۇحامەدوۆپەن كەزدەسىپ، ەكى جاقتىق قارىم-قاتىناستى دامىتۋ، حالىقارالىق جانە ايماقتىق ماسەلەلەردى تالقىلايدى دەپ كۇتىلۋدە. بىراق ساراپشىلار پىكىرىنشە، حاسان ءرۋحانيدىڭ بۇل جولعى ساپارى نەگىزىنەن تۇركىمەنستان مەن يران اراسىنداعى گاز داۋىنا ارنالادى جانە وسى باعىتتا ءبىر قاتار قۇجاتتارعا قول قويىلادى.

ەستەرىڭىزگە سالايىق، بۇعان دەيىن 2017 جىلدىڭ جەلتوقسان ايىندا يران تاراپى تۇركىمەنستاندى گاز داۋىنا بايلانىستى حالىقارالىق سوتقا بەرەتىنىن مالىمدەگەن. ال رەسمي اشحاباد تەھراننىڭ بۇل شەشىمىن قولدايتىنىن ايتقان. ەكى ەل اراسىنداعى گاز داۋى يراننىڭ تۇركىمەنستان الدىنداعى قارىزىن وتەمەۋىنەن باستالعان.

“The Qazaq Times”