قار سۋى الماتى ماڭىنداعى ەلدى مەكەن تۇرعىندارىن ابىگەرگە سالدى (ۆيدەو)

الماتى وبلىسىنىڭ قاراساي اۋدانى قاسكەلەڭ كەنتىندە، تالعار اۋدانىنداعى تۇزدىباستاۋ، بەسەعاش اۋىلدارىن سۋ باسۋ قاۋپى سەيىلمەي تۇر. الماتى وبلىستىق توتەنشە جاعدايلار دەپارتامەنتىنىڭ مالىمەتىنە قاراعاندا سۋ باسۋ قاۋپىنە بايلانىستىتۇزدىباستاۋ اۋىلىنىڭ 1000 تۇرعىنى قاۋىپسىز جەرگە كوشىرىلگەن.

تجد ءباسپاسوز قىزمەتىنىڭ مالىمەتىنشە، جاۋىن-شاشىن مەن قاردىڭ ەرۋى سالدارىنان  27 اقپاندا تۇنگى ساعات وندار شاماسىندا 50 تەكشە مەتر سۋ جينالىپ 250 ءۇيدىڭ تۇرعىندارى قاۋىپسىز ورىندارعا جىبەرىلگەن.

ايتا كەتەيىك، كەشەلى بەرى الەۋمەتتىك جەلىلەردە  الماتى ماڭىنداعى ەلدىمەكەندەردى سۋ باسقانى تۋرالى ۆيدەولار كوبەيىپ كەتتى. ۆيدەودان سەل ءجۇرۋ سالدارىنان جول قوزعالىسى قيىنداپ، كوپتەگەن ۇيلەردىڭ اۋلاسىن سۋ باسقانىن كورۋگە بولادى.

كۇننىڭ كۇرت جىلىنۋ سالدارىنان بۇل قازاقستاننىڭ كەز كەلگەن وڭىرىندە جىلدا قايتالاناتىن جاعداي. ال جاۋاپتى ورگاندار "سۋ باسۋ سالدارىن الدىن الدىق" دەگەن كۇننىڭ وزىندە، جاعدايدى رەتتەۋ ۋاقىتىنان بۇرىن قولعا الىنبايتىنى كوپتىڭ اشۋىن تۋعىزاتىنى بەلگىلى.

“The Qazaq Times”