لاۆروۆ: كەز كەلگەن مەملەكەتتىڭ تەرريتوريالىق تۇتاستىعىن قۇرمەتتەۋ كەرەك

رەسەي سىرتقى ىستەر ءمينيسترى سەرگەي لاۆروۆ «كەز كەلگەن مەملەكەتتىڭ تەرريتوريالىق تۇتاستىعىن قۇرمەتتەۋ كەرەك» - دەپ مالىمدەدى.

سەرگەي لاۆروۆ ءسۇريانىڭ افرين اۋماعىنداعى اسكەري وپەراتسيالارعا بايلانىستى جۋرناليستەر الدىندا ءسوز سويلەگەن. وندا ول: «افرين اۋماعىنا قاتىستى ماسەلەلەردىڭ بارلىعى ءسۇريانىڭ تەرريتوريالىق تۇتاستىعى نەگىزىندە شەشىلۋى ءتيىس. ءبىز قانداي ماسەلە بولسا دا ول ءسۇريا بولسىن، باسقاسى بولسىن كەز كەلگەن مەملەكەتتىڭ تەرريتوريالىق تۇتاستىعىن قۇرمەتتەۋ ارقىلى شەشىلگەنىن قولدايمىز. تۇركيانىڭ ءوز قاۋىپسىزدىگىنە الاڭداۋى زاڭدى. بىراق ونى ءسۇريا بيلىگىمەن تىكەلەي ديالوگ جۇرگىزۋ ارقىلى دا قامتاماسىز ەتۋگە بولادى» - دەگەن.

ءبىر قىزىعى رەسمي ماسكەۋدىڭ ءوزى 2014 جىلى ۋكراينانىڭ قىرىم تۇبەگىن اننەكتسيالاعان بولاتىن. ال رەسەي قارۋلى كۇشتەرىنىڭ قاتىسى بار دەلىنگەن دونباسس پەن لۋگانسكىدە ءالى كۇنگە دەيىن سوعىس جۇرۋدە.

ەستەرىڭىزگە سالايىق، 20 قاڭتار كۇنى تۇركيا ءسۇريانىڭ افرين اۋماعىنا اسكەرىن كىرگىزگەن بولاتىن. رەسمي انكارانىڭ بۇنداي قادامدارعا بارۋىنا اقش-تىڭ «ءسۇريادا شەكارا قاۋىپسىزدىگىن قامتاماسىز ەتەتىن ارنايى جاساق قۇرامىز» - دەگەن مالىمدەمەسى سەبەپ بولعان.

“The Qazaq Times”