ەردوعانعا قاستىق جاساماق بولعان تەررورلىق توپ مۇشەلەرى ۇستالدى

تۇركيا اقپارات قۇرالدارى «DHKP-C» دەپ اتالاتىن ۇيىمدى تۇركيا پرەزيدەنتى رەجەپ تايىپ ەردوعانعا «قاستاندىق جاساماق بولدى» دەپ ايىپتادى. اتالعان ۇيىمدى تەررورلىق ۇيىم دەپ جاريالاعان تۇركيالىق باق، 9 تەرروريستىڭ گرەكيادا ۇستالعانىن حابارلاۋدا. بۇل تۋرالى «تۇرىك تەلە-راديو» قىزمەتىنىڭ رەسمي سايتى «To Vima» باسىلىمىنا سىلتەمە جاساي وتىرىپ حابارلادى.

گرەكيا پوليتسيا تاراۋلارى جاريالاعان مالىمەتتى العا تارتقان حاباردا،  اتالعان تەررورلىق ۇيىم پرەزيدەنتى ەردوعانعا بىرنەشە رەت شابۋىل جاساعانى ايتىلعان. حابارعا قاراعاندا گرەكيا پوليتسيا تاراۋلارى جاساعان وپەراتسيا كەزىندە ۇيىم مۇشەلەرى تۇرىك ەلىنىڭ باسشىسىنا شابۋىل جاساۋ جوسپارلارى كەزىندە قولعا تۇسكەن. وندا ولاردىڭ گرانات، زىمىران جانە وزگە قارۋلاردى قولدانباق بولعانى دالەلدەنگەن.

شابۋىل جوسپارىندا ەردوعانعا «شايان» دەگەن لاقاپ ات قويعان. سونىمەن بىرگە ەردوعاننىڭ كولىك كەرۋەنىنە زىمىرانمەن شابۋىل جاسايتىنى كورسەتىلگەن. پوليتسيا جاق افينانىڭ شىعىسىنداعى پارنيتحا تاۋىنا جاسىرىلعان زىمىراندار مەن وزگە قارۋ-جاراق، وق-دارىلەردى ىزدەستىرىپ جاتقانىن مالىمدەدى.

“The Qazaq Times”