اقش رەسەي اسكەرلەرىنىڭ ءسۇريادان تولىق كەتەتىنىنە سەنبەيدى

رەسەي پرەزيدەنتىنىڭ ۆلاديمير ءپۋتيننىڭ رەسەي اسكەرلەرىن ءسۇريادان شىعارۋ شەشىمىنە اقش قورعانىس وكىلدەرى كۇمانمەن قارايدى. وسى اپتانىڭ باس شەنىندە پەنتاگون جاريالاعان مالىمەتتە ءپۋتيننىڭ مۇنداي شەشىمى وسىدان بۇرىندا ايتىلعانىن، بىراق ءسۇريادان اسكەر شىعارۋ ءىسىنىڭ ناقتى ارەكەت جۇزىندە جۇزەگە اسپاي كەلە جاتقانىن ايتقان ەدى. ءبىر كۇن بۇرىن پەنتاگون وكىلدەرى اقش اسكەرلەرى ءسۇريادا قالاتىنىن جاريا ەتتى. بۇل تۋرلى «شينحۋانىڭ» رەسمي سايتى حابارلادى.

پەنتاگون مالىمدەمەشىسى سوزىندە: «رەسەيدىڭ ءسۇريادان اسكەرلەرىن شىعارۋ شەشىمى، ناقتى ءىس جۇزىندە ورىندالىپ وتىرعان جوق. سوندىقتان اقش-تىڭ سۇرياداعى اسكەري قادامدارىنا اسەر ەتپەيدى»، – دەدى. اقش لاۋازىمدىلارىنىڭ ءبىرى: «پۋتين اسكەرلەرىن سيمۆولدىق تۇرعىدا عانا شىعارۋى مۇمكىن. ول تەك كەيبىر اسكەري كۇشتەرىن عانا ءسۇريادان الىپ كەتىپ، قۇراما شتات اسكەرلەرىنىڭ سول ەلدەن كەتۋىن تالاپ ەتپەك»، – دەگەن پىكىرىن ايتقان.

وتكەن اپتادا اقش قورعانىس كۇشتەرى جاريالاعان مالىمەتتە، اقش اسكەرلەرى قاجەتتى جاعدايدا ءسۇريادا قالاتىنىن، «يم» تەررورلىق توبىنا قارسى كۇرەستى جالعاستىراتىنىن، «جيھادشىلاردىڭ» قايتا باس كوتەرە المايتىنىنا كوز جەتكىزگەنگە دەيىن ونداعى اسكەري قادامداردىڭ جالعاساتىنىن ايتقان ەدى.

پەنتاگون مالىمدەمەشىسى ادريان رانكين سوزىندە: «كواليتسيا كۇشتەرى ەلدەگى كۇرەستى جالعاستىرا بەرەدى. جەرگىلىكتى قارۋلى كۇشتەردىڭ تەرروريزمگە قارسى كۇرەسىنە قولداۋ كورسەتىپ، «يم» كۇشتەرىنە قارسى كۇرەسەدى. تەررورلىق توپتاردان تازارتىلعان ايماقتاعى تۇرعىنداردى قورعاپ، بوسقىنداردى مەكەندەرىنە قايتاراتىن بولادى»، – دەدى.

“The Qazaq Times”