اقش وندىرگەن "Thaad" اۋە قورعانىس جۇيەسى. فوتو: CNN.com.

وڭتۇستىك كورەيا «يونحاپ» اقپاراتتىق اگەنتتىگىنىڭ حابارىندا، سول ەلدىڭ قورعانىس ءمينيسترى حان مينكيۋ مالىمدەمە جاساپ، «ساد» زىمىرانعا قارسى جۇيەسىنىڭ اسكەري ىستەر تۇرعىسىنان ارتيللەريالىق قارۋ سانالاتىنىن، كورشى ەلدەر ونى اسىرا باعالاپ وتىرعانىن جەتكىزدى. بۇل قىتاي مەن وڭتۇستىك كورەيا اراسىنداعى ەڭ كۇردەلى قايشىلىقتاردىڭ ءبىرى بولىپ سانالادى. جاقىندا وڭتۇستىك كورەيا پرەزيدەنتى قىتايعا رەسمي ساپارىن باستاماق. قىتاي اقپارات قۇرالدارى كورەيا قورعانىس ءمينيسترىنىڭ اتالعان پىكىرىن جارىسا تالداۋدا. بۇل تۋرالى «شينلاڭ» اقپاراتتىق سايتى حابارلادى.

پارلامەنتتىڭ ماقۇلداۋىنسىز «ساد» اۋە قورعانىس قۇرىلعىسىن ورناتقان ۇكىمەتتىڭ شەشىمىنە قارسى دەپۋتاتتارعا، بۇگىن تۇستەن بۇرىن وڭتۇستىك كورەيانىڭ قورعانىس ءمينيسترى حان مينكيۋ جاۋاپ بەردى. ول سوزىندە: «اسكەري تۇرعىدان العاندا، «Thaad» ارتيللەريالىق قۇرال. ال، كورشى ەلدەر بولسا «ساد» جۇيەسى تۋرالى اسىرا ايتىپ، وسى تۋرالى داۋدىڭ ءورشىتتى. ۇكىمەتىمىز ىشكى قۇقىقتىق ماسەلەلەردى قاراستىردى، سوندىقتان پارلامەنتتىڭ ماقۇلداۋىن كۇتۋدىڭ قاجەتى جوق»، – دەدى.

مالىمدەمەدەن كەيىن حان مينكيۋدەن «ساد» جۇيەسىنىڭ تۋعىزاتىن زيانى تۋرالى سۇراعاندا، ول: «اقش-تىڭ اسكەري قىزمەتكەرلەرى اتالعان جۇيەنىڭ قورشاعان ورتاعا اسەرىن باعالاۋدى جانە باسقا دەرەكتەردى مودەلدەۋ سىناقتارىن وتكىزدى، ونىڭ زياندىلىعىن جىڭىشكەلىكپەن باعالاپ شىققان»، – دەپ جاۋاپ بەردى.

«ساد» جۇيەسىنىڭ ورناتىلۋىنا قىتايدىڭ قارسىلىعى وڭتۇستىك كورەيانىڭ پارلامەنتى مەن ۇكىمەتى اراسىندا كوپ داۋلى پىكىرلەر تۋعىزدى. قىتاي «ساد» جۇيەسىنىڭ كورەي تۇبەگىنە ورناتىلۋى قىتايدىڭ ستراتەگيالىق قاۋىپسىزدىگىنە قاتەر توندىرەدى دەپ قارادى. سونىمەن بىرگە وپپوزيتسيالىق پارتيالاردىڭ دا قارسى پىكىرىن كۇشەيتتى. وسىدان بۇرىن وڭتۇستىك كورەيا قورعانىس ءمينيسترى: «ساد» جۇيەسىن قولدانۋ مەن قولدانباۋدى وڭتۇستىك كورەيانىڭ ءوزى شەشەشى، بۇعان كورشى مەملەكەتتەردىڭ ارالاسۋ قۇقىعى جوق»، – دەگەن پىكىرىن ايتقان. بۇل قىتاي مەديالارىنىڭ كۇشتى سىنىنا ۇشىراعان ەدى.

“The Qazaq Times”