سولتۇستىك كورەيا ىستەرى جونىندەگى مينيستر چو ميون گيون.

وڭتۇستىك كورەيانىڭ سولتۇستىك كورەيا ىستەرى جونىندەگى ءمينيسترى چو ميون گيون مالىمدەمە جاساپ: «وسى جىلى سولتۇستىك كورەيا يادرولىق باعدارلامانى دامىتۋدا قارقىندى تۇردە تابىستارعا جەتتى. بۇل كيم رەجيمىنىڭ كورەي تۇبەگىن كۇشپەن بىرىكتىرۋ، ءارى وعان ءوزىنىڭ يەلىك ەتۋ ماقساتىنىڭ بولعانىن كورسەتەدى»، – دەدى. بۇل تۋرالى «WSJ» باسىلىمى حابارلادى.

چو ميون گيون بەيسەنبى كۇنى سوزىندە، سولتۇستىك كورەيانىڭ بۇل امبيتسيالارى شىندىققا ساي كەلمەيتىنىن قاداي ايتتى. ول سولتۇستىك كورەيانى وڭتۇستىك كورەيامەن كەلىسسوز جۇرگىزۋگە شاقىردى. سولتۇستىك كورەيا سوڭعى ايدا زىمىران ۇشىرماعانىمەن كەلىسسوز ۇستەلىنە كەلۋگە نيەت تانىتپاي وتىرعانىن العا تارتتى. ول سوزىندە: «اقش پرەزيدەنتى دونالد ترامپ وتكەن اپتادا سەۋلگە ساپارى كەزىندە سولتۇستىك كورەياعا كەلىسىم بەرۋ تۋرالى كەيبىر ەسكەرتۋلەر جاساعانىمەن، وڭتۇستىك كورەيا ۇكىمەتى ترامپتىڭ سولتۇستىك كورەياعا قاراتقان نەگىزگى ۇستانىمىندا ەشقانداي وزگەرىس جوق دەپ سانامايدى»، – دەدى.

ەكى كورەيا اراسىنداعى ديپلوماتيالىق ىستەردە ۇزاق جىلدان بەرى قىزمەت اتقارعان چو ميون گيون 2007 جىلى ەكى ەل اراسىنداعى كەلىسسوزدى ۇيىمداستىرۋعا دا ات سالىسقان. سول كەزدە سولتۇستىك كورەيانىڭ ەڭ جوعارى باسشىسى كيم جوڭ يل بولىپ تۇردى. بىراق، وسى رەتكى كەلىسسوز ساتىمەن اياقتالمادى جانە ەكى ەلدىڭ قارىم-قاتىناسى بىرتىندەپ ناشارلاي بەردى.

چو ميون گيون سوڭعى كەزدەردەگى وقيعالاردىڭ دامۋىنا تالداۋ جاساي كەلە: سولتۇستىك كورەيانىڭ بۇل قادامدارى كيم جوڭ ۋننىڭ ىشكى ويىن انىق اڭعارتادى، ول ەكى كورەيانى كۇشپەن بىرىكتىرىپ، بارلىعىن ءوزىنىڭ رەجيمىنە قاراتقىسى كەلەدى. بىراق، ونىڭ بۇل ارمانى ەشقاشان ىسكە اسپايدى»، – دەدى.

“The Qazaq Times”