ترامپ وڭتۇستىك كورەيا پارلامەنتىندە ءسوز سويلەۋدە. فوتو: WSJ.

ازيا ساپارىندا جۇرگەن قۇراما شتات پرەزيدەنتى دونالد ترامپ بۇگىن تاڭەرتەڭ وڭتۇستىك كورەيانىڭ پارلامەنت مۇشەلەرىمەن كەزدەستى. كەزدەسۋ كەزىندە ءسوز سويلەگەن اقش پرەزيدەنتى كيم جوۋ ۋنعا (كيم چەن ىن) سولتۇستىك كورەيانىڭ يادرولىق باعدارلاماسىنان كەلىپ شىعاتىن زارداپتار تۋرالى ەسكەرتتى. بۇل تۋرالى «WSJ» باسىلىمى حابارلادى.

ترامپ سوزىندە وڭتۇستىك كورەيانىڭ تابىستى كاپيتاليستىك ەكونوميكاسىن سولتۇستىك كورەيامەن سالىستىرا سويلەدى. 1953 جىلى كورەي تۇبەگى سوعىسى اياقتالىپ، تۇبەك ەكىگە بولىنگەن كەزدە ەكى ەلدىڭ ەكونوميكاسىنىڭ دەڭگەيى بىردەي بولعانىن، ال قازىرگى كەزدە وڭتۇستىك كورەيانىڭ ەكونوميكاسى كحدر-دان بىرنەشە ەسەگە قۋاتتى ەكەنىن العا تارتتى. ول تاعى كيم جوڭ ۋندى وزدەرىنە دە وزگەگە دە قاتەر الىپ كەلەتىن يادرولىق قارۋدى دامىتۋ باعدارلاماسىنان باس تارتۋعا شاقىردى.  كحدر باسشىسىنا قاراتا: «قازىرگى اقش ۇكىمەتى بۇرىنعىعا ۇقسامايدى. ءبىزدى تومەن باعالاماڭىز جانە ەلەمەي قالماڭىز»، – دەگەن اشىق پوزيتسياسىن ءبىلدىردى.

ترامپ سولتۇستىك كورەياعا قاراتقان سوزىندە: «سولتۇستىك كورەيا كيم جوڭ ۋننىڭ اتاسى (سولتۇستىك كورەيانىڭ نەگىزىن قالاۋشى كيم يل سۋڭدى/ Kim Il Sung-دى مەگزەپ وتىر)  ەلەستەتكەن جۇماق ەمەس، بىراق توزاق تا ەمەس. ەشكىمدە مۇنداي توزاق ءومىر سۇرۋگە ءتيىستى ەمەس»، – دەدى. ترامپ قۇراما شتاتتىڭ جارقىن بولاشاققا باستايتىن جولدى تاعايىنداپ بەرەتىنىن، ول ءۇشىن سولتۇستىك كورەيانىڭ ارانداتۋشىلىقتى توقتاتۋى،  زىمىران جانە يادرولىق قارۋدى دامىتۋ باعدارلامالارىنان تولىعىمەن باس تارتىپ، مۇقيات يادروسىزداندىرۋدى جۇزەگە اسىرۋى كەرەك ەكەنىن ايتتى.

اقش پرەزيدەنتىنىڭ وڭتۇستىك كورەيا پارلامەنت مۇشەلەرى الدىنداعى سويلەگەن ءسوزى 35 مينۋتقا جالعاستى. بۇل باس-اياعى 24 ساعاتقا جوسپارلانعان وڭتۇستىك كورەيا ساپارىنىڭ ماڭىزدى ءارى سوڭعى ءبولىمى ەدى. وسىدان كەيىن ول 10 كۇندىك ازيا ساپارىنىڭ ءۇشىنشى بەكەتى – قىتاي استاناسى بەيجىڭگە اتتانىپ كەتتى.

“The Qazaq Times”