ءۇش ەل باسشىسى بۇۇ ماجىلىسىندە كەزدەسكەن. فوتو: 新唐人.

قۇراما شتات پرەزيدەنتى دونالد ترامپتىڭ ازيا-تىنىق مۇحيت ەلدەرىندەگى العاشقى ساپارى جاپونيادان باستالادى. توكيودا جاپونيانىڭ پرەمەر-ءمينيسترى شينزو ابەمەن كەزدەسىپ، كەلىسسوزدەر وتكىزەدى. ەكى ەل باسشىلارىنىڭ كەزدەسۋىندە اقش پەن جاپونيا اراسىنداعى ساۋدا كەلىسىمى باستى تاقىرىپ بولادى دەپ كۇتىلۋدە. بۇل تۋرالى «People» باسىلىمى حابارلادى.

اقپارات كوزدەرىنىڭ مالىمەتىنە قاراعاندا، ترامپ 5 قاراشا كۇنى توكيوعا جەتىپ، ايماقتاعى العاشقى ساپارىن باستايدى. سول كۇنى شينزو ابە مەن ترامپتىڭ كەڭەسى گولف الاڭىنان باستالادى.  6 قاراشا كۇنى ەكى ەل ۇكىمەتىنىڭ جوعارى دارەجەلى كەلىسسوز وتىرىسى بولماق. اقش جاق ەكى ەل اراسىندا ساۋدا-ەكونوميكا ماسەلەلەرىندەگى قايشىلىقتاردىڭ شەشىم تابۋىنا بارىنشا نازار اۋدارىپ وتىرعانىن ايتادى.

جاپونيانىڭ پرەمەر-ءمينيسترى شينزو ابە بيىلعى جىلدىڭ اقپان ايىندا العاش رەت ترامپپەن كەزدەسكەن بولاتىن. سول كەزدە ول ساۋدا تەڭگەرىمىنىڭ كوتەرىلۋىنە نارازىلىق بىلدىرگەن. اقش ۆيتسە-پرەزيدەنتى مەن جاپونيانىڭ ۆيتسە-پرەمەرى ەكى ەل اراسىنداعى ساۋدا كەلىسىمدى دامىتۋدى جارتى جىل بۇرىن قولعا العان ەدى.

جاپونيا اقپارات قۇرالدارىنىڭ حابارىنا قاراعاندا ترامپ ەكى ەل اراسىنداعى ساۋدا ايىرباس كولەمىن 70 ملرد اقش دوللارىنا جەتكىزۋدى ءۇمىت ەتەدى. دەگەنمەن، جاپونيا جاق سىرتتان كىرەتىن اۆتوكولىك ساۋداسىنا توسقاۋىل قويعان. ونسىزدا اقش اۆتوكولىكتەرىنىڭ جاپونياداعى نارىعى تىم تومەن. ال، ترامپ ۇمىت ەتىپ وتىرعان ساۋدا كولەمىندە اۆتوكولىك ساۋداسى دا قامتىلعان. ەكى ەل اراسىنداعى وسىنداي بىرنەشە قايشىلىق الداعى كەلىسسوزدە شەشىم تابۋى قيىن بولماق.

ايتا كەتەيىك، ترامپ بيلىككە كەلگەلى بەرى اقش-تىڭ كوپجاقتى ساۋدا كەلىسىمىن بارىنشا تەجەپ، ەلدەرمەن ەكىجاقتى كەلىسىمدەردى جۇزەگە اسىرۋدى قولداپ كەلەدى. ازيا ساپارى كەزىندە ترامپ بارعان ەلدەرمەن ساۋدا-ەكونوميكالىق كەلىسىمدەردى جۇزەگە اسىرۋعا تىرىسادى. تەك ول عانا ەمەس، سولتۇستىك كورەيا ماسەلەسىندە دە بۇل ەلدەرمەن كەلىسىمگە كەلۋگە كۇش سالاتىن بولادى.

“The Qazaq Times”